Koronavirus pandemiyasının qarşısının alınması məqsədilə Avstriyanın əsas turizm regionlarından biri olan Tirol federal əyalətində bütün otellər martın 15-dən etibarən fəaliyyətini dayandıracaq.
AZƏRTAC xəbər verir ki, bu barədə məlumatı federal əyalətin qubernatoru Qünter Platter təsdiqləyib. O bildirib ki, bu qərar nə qədər sərt olsa da, onun alternativi yoxdur.
Qeyd edilib ki, Alp dağlarında xizək mövsümünün qızğın vaxtında dağlarda kanatların fəaliyyətinin dayandırılması və otellərin bağlanması virusun yayılmasının qarşısını almağa xidmət edir. Bu həftəsonu 150 min turistin federal əyalət ərazisində otellərə gələcəyini nəzərə alıb. Əyalət hökuməti bu qərarla turist axınının qarşısını almalı olub. Əyalət hökumətindən turizm obyektləri üçün subsidiyaların veriləcəyi də vəd olunub.
Tirol əyalətindəki dağ kanatları müəssisələri birliyinin rəhbəri Frants Hörl bu haqda məlumat verib. Bu qərarın icrası müəssisələr üçün həftəlik 180-200 milyon avro itki deməkdir. O, mövsümün pik vaxtında otel və kanatların bağlanmasını 250 km/saat sürətlə hərəkət edən qatarın stop-kran əyləci ilə dayandırılması ilə müqayisə edib.
Qeyd edilməlidir ki, Avstriyada koronavirusa yoluxanların (422 nəfər) mühüm bir hissəsi (110 nəfər) Tirol əyalətinin payına düşür və bu əyalətin İtaliya ilə həmsərhəd olması sərt qərarların qəbul olunmasını qaçılmaz edib.
