Noyabrın 26-da Azərbaycan Milli Kulinariya Mərkəzi (AMKM) Türkiyədə Dənizli Gənc Aşçılar Dərnəyi tərəfindən təşkil olunan “Gastro World Master Chefs” adlı beynəlxalq qastronomiya festivalı çempionatı ilə bağlı mətbuat konfransı keçirib.
AMKM-nin baş direktoru Tahir Əmiraslanov festival barədə məlumat verib. Bildirib ki, festivalda 15 ölkədən (Azərbaycan, Rusiya, Almaniya, Israil, Suriya, Sloveniya, Serbiya, İsveç, Fələstin, İraq, Türkiyə, Yunanıstan, Qana, İsveçrə, Makedoniya) 400 aşpaz iştirak edib.
Qeyd edib ki, ölkəmizi Azərbaycan Milli Kulinariya Assosiasiyasının üzvü aşpaz Ruslan Şıxıyevin rəhbərliyi altında “Qafqaz” otellər şəbəkəsinin işçiləri təmsil edib.
T.Əmraslanov vurğulayıb ki, AMKM-nin komandası ümumilikdə 7 qızıl, 2 gümüş, 2 bürünc medalı qazanıblar. Qara qutu yarışmasında komanda qızıl medal əldə edib. R.Şıxıyev münsiflər heyətində iştirak edib.
Bildirib ki, Türkiyədə Dənizli şəhərində keçirilən bu kulinariya çempionatında, eyni zamanda, Azərbaycan Aşpazlar Gildiyasının komandası da iştirak edib. Ölkəmiz ümumilikdə bu çempionatdan 11 qızıl, 3 gümüş, 6 bürünc medal 1 kubokla geri dönüb.
Noyabrın 16-dan 21-dək Rumıniyanın Sibiu şəhərində “Ənənəvi toy süfrəsi” Kulinariya Ənənələri Konqresində iştirak edən AMKM-nin baş direktor müavini Ceyran Əsgərova və Milli Kulinariya Assosiasiyasının üzvü, “Monte Napoleone” restoranının baş aşpazı Hüseyn Quliyev tədbirlə bağlı məlumat veriblər. Qeyd edilib ki, konqresdə C.Əsgərova “Azərbaycan milli toy süfrə mədəniyyəti” adlı məruzə ilə çıxış edib, H.Quliyev isə ənənəvi toy xörəklərini hazırlayaraq milli toy süfrəsi açıb.
