2021-ci ilin əvvəlindən Rusiyada vahid elektron viza tətbiq olunacaq.
AZƏRTAC Estoniya mətbuatına istinadla xəbər verir ki, vətəndaşları elektron viza almaq üçün müraciət edə biləcək dövlətlərin siyahısı Rusiyanın Baş naziri Mixail Mişustinin sərəncamı ilə təsdiqlənib.
Rusiya hökumətinin rəsmi saytının verdiyi məlumata görə, siyahıda Estoniya, Latviya, Litva, Finlandiya da daxil olmaqla, 52 ölkə yer alıb.
Bildirilib ki, elektron viza internet vasitəsilə turizm, işgüzar, humanitar və qonaq səfərləri məqsədilə veriləcək. Qeyd edilib ki, vizanı əldə etmək üçün dəvətnamələrə, otel rezervasyonlarına və ya səfərin məqsədini təsdiqləyən digər sənədlərə ehtiyac qalmayacaq. Konsulluq haqqı 40 dollar təşkil edəcək. Viza 6 yaşadək olan uşaqlar üçün pulsuz veriləcək.
