“Swiss International” Misirin turizm sektoruna 450 milyon dollar sərmayə qoyacaq

Yaxın Şərqdə “Swiss International” şirkətini təmsil edən Səudiyyə Turizmin İnkişafı Qrupu Misirin turizm sektoruna 450 milyon dollar sərmayə qoyacaq. Fevralın 21-də qrup Misirin “Taravat Investment” firması ilə müvafiq kontrakt imzalayıb.

Kontraktda qarşıdakı iki il ərzində Misirdə İsveçrə brendi ilə səkkiz otelin tikilməsi nəzərdə tutulur. Yeni və ən yüksək standartlara cavab verəcək otellər paytaxt Qahirə, Hurqada, Şarm əl-Şeyx, Marsa Alam, habelə tarixi abidələrin olduğu Luksor və Asuanda tikiləcək. Misirin paytaxtında yerləşəcək otelin hazırda inşaat işlərinin davam etdiyi Yeni Qahirədə olacağı bildirilir.

Qeyd olunub ki, “Swiss International” şirkəti Səudiyyə Ərəbistanı və digər Körfəz ölkələrində 2020-ci ilin sonundan etibarən 30 otelin tikilməsi üzrə layihə hazırlayıb. Qarşıdakı 5 ildə Misirdə şirkət tərəfindən 20 otel istifadəyə veriləcək. Bundan başqa, Əlcəzair, Tunis və Mərakeşdə də turizm obyektləri tikiləcək.

1982-ci ildə fəaliyyət başlayan “Swiss International” şirkəti 2014-cü ildən bəri Yaxın Şərqdə turizm sektoruna sərmayə qoyur.