Tunis Otelçilər Federasiyasının məlumatına görə, ölkədə 800 oteldən yalnız 300-ü açıqdır.
AZƏRTAC xəbər verir ki, Tunis Mərkəzi Bankının qiymətləndirmələrinə əsasən, yanvar–avqust ayları dövründə turizmdən gələn gəlir keçən ilin müvafiq dövrü ilə müqayisədə 59 faiz aşağı düşüb. İtkilər isə ilin sonunda 2 milyard avroya yüksələcək. Bu da hələ pandemiyadan əvvəl qeyri-sabit vəziyyətdə olan iqtisadiyyat üçün həyəcan doğuran rəqəmdir.
Tunis hökuməti itkiləri minimallaşdırmaq niyyətindədir, çünki hər hansı gəlirdən danışmaq belə olmaz.
Ölkədə koronavirusa 3323 yoluxma halı və bu xəstəlikdən 73 ölüm faktı qeydə alınıb. Sərhədlər iyunun 27-də açılıb. Virusa yoluxma halı istənilən Avropa ölkəsi ilə müqayisədə daha aşağıdır, buna görə də Tunis Aİ üçün təhlükəsiz ölkələrin seçilmiş siyahısına daxildir. Lakin son həftələr təyyarələr yalnız yarıya qədər sərnişinlərlə dolu gəlirdi. Əlcəzair hər il bir milyondan çox turistin gəlməsi sayəsində Tunis üçün əsas gəlir mənbəyidir.
ÜDM-in 8 faizindən çoxunu təşkil edən və 400 min insanı işlə təmin edən turizm sektorunda böhran ilin ikinci rübündə ÜDM-in 21,6 faiz azalmasına əhəmiyyətli dərəcədə təsir etdi. Otelçilikdən savayı, sənaye və tikintiyə mart ayında hökumət tərəfindən tətbiq edilmiş sərt məhdudiyyətlər səbəbindən ziyan dəydi. Bu qaranlıq mənzərə 161 min iş yerinin itirilməsinə gətirib çıxardı, işsizliyin səviyyəsi isə 18 faizə çatdı.
Maliyyə naziri Nizar Yaiş dövlət maliyyəsi üçün tələb olunan yardımın məbləğini təxminən 3 milyard avro həcmində hesablayıb.
