Azərbaycan Turizm Bürosunun təşkilatçılığı ilə Birləşmiş Ərəb Əmirlikləri (BƏƏ), Hindistan və Çindən olan turoperatorlarla yerli turizm şirkətləri arasında tanışlıq görüşləri baş tutub.
turizm
BƏƏ turoperatoru ilə görüşdə Azərbaycanı təmsil edən 80 turizm şirkəti iştirak edib. İkitərəfli müzakirələr çərçivəsində qonaqlara turizm üzrə ətraflı məlumat verilib.
turizm
Hindistanda 50 yerli turizm şirkətinin iştirak etdiyi turoperatorları ilə görüş keçirilib. Görüş çərçivəsində ölkəmizin turizm potensialından danışılıb. Xüsusilə bu ölkə vətəndaşlarının maraq göstərdiyi toy turizmi üzrə yerli imkanları əks etdirən təqdimat nümayiş olunub. Əməkdaşlıq perspektivləri qiymətləndirilib.
Çindən olan turizm şirkətləri ilə görüş zamanı isə Azərbaycan və onun turizm imkanları, mövcud infrastruktur, hotellər, milli mətbəx, turizm marşrutları barədə geniş məlumat verilib. 60 yerli turizm şirkətinin iştirakı ilə B2B (Biznesdən-biznesə) formatlı müzakirələr baş tutub.
B2B xarakterli görüşlərin təşkil edilməsində məqsəd yerli turizmin inkişafıdır. Qonaqpərvərlik sənayesinin nümayəndələrini hər üç ölkənin turizm şirkətlərinin təmsilçiləri ilə bir araya gətirməkdir. İkitərəfli əməkdaşlığa şərait yaratmaqdır.
Hər üç ölkədən olan turizm şirkətləri nümayəndələrinin regionlarda yerləşən hotellər, turizm və xidmət obyektləri, eləcə də tarixi məkanlara səfərləri təşkil ediləcək.
Qeyd edək ki, 2018-ci ilin sonundan etibarən BƏƏ-nin Dubay, Hindistanın Mumbay, Çinin Pekin şəhərində ölkəmizin rəsmi turizm nümayəndəliyi fəaliyyət göstərir.
