PAYLAŞ

2018-ci ildə Azərbaycana səfər edən hindistanlı turistlərin sayı 175 faiz artaraq 40 min nəfərə çatıb.

Turizm Bürosunun baş icraçı direktoru Florian Zenqstşmid Hindistanın nüfuzlu “Times of India” informasiya agentliyinə müsahibəsində deyib.

Florian Zenqstşmid Azərbaycanın turizm imkanları haqqında danışaraq son illərdə hindistanlı turistlərin Azərbaycana daha çox maraq göstərdiyini vurğulayıb. O qeyd edib ki, Hindistan Azərbaycan Turizm Bürosunun rəsmi nümayəndəliyinin açıldığı ilk altı ölkədən biridir. Hindistan bazarı haqqında daha əvvəldən araşdırma aparıldığını, potensial turistlərin maraqlarının öyrənildiyini bildirib. F.Zenqstşmid Azərbaycanın yeni turizm konsepsiyası ilə ölkənin turizm imkanları haqqında məlumatın daha yaxşı çatdırıla biləcəyini deyib.

Müasir tikililər, müxtəlif restoranlar, ticarət mərkəzləri, Xəzər dənizi sahili, palçıq vulkanları, təbii parklar, gözəl təbiət, 9 fərqli iqlim tipi var. Naftalanda müalicəvi neft və ən əsası təhlükəsizlik və müasir dünyagörüşlü insanlara malik olması kimi amillər Azərbaycanı mütləq ziyarət edilməli olan yerlər sırasına daxil edir. Azərbaycan təbiətində kəşf olunmamış gözəlliklər gizləndiyini qeyd edib. F.Zenqstşmid ölkə boyunca gəzdikdə hər an fərqli yeniliklərlə tanış olmaq şansından, eləcə də dadlı Azərbaycan mətbəxindən bəhs edib.

Dehli-Bakı uçuşları

Baş icraçı direktor bildirib ki, mühüm amillərdən biri də Azərbaycana səfər etməyin asan olmasıdır. Belə ki, hindistanlı turistlər cəmi 3 saat ərzində onlayn olaraq viza əldə edə bilmə imkanına malikdirlər. O əlavə edib ki, Azərbaycana hazırda əsasən Körfəz ölkələri üzərindən uçuşlar həyata keçirilib. Gələcəkdə birbaşa Dehli-Bakı uçuşlarının həyata keçirilməsi nəzərdə tutulub.

F. Zenqstşmid Azərbaycan və Hindistan xalqının ümumi mədəni və tarixi dəyərlərə malik olduğunu, hindli turistlər üçün “Atəşgah” məbədinin də daxil edildiyi xüsusi turların təşkil olunduğunu vurğulayıb. Paytaxt Bakıda tarixilik və müasirliyinin vəhdət təşkil etdiyini bildirib.

O, əsas hədəf kimi kütlənin müxtəlif yaş qrupundan olan individual səyahətçilər, gənclər qrupu və ailələr olduğunu qeyd edib. Həmçinin hindli turistlər üçün müxtəlif bayram, toy və s. kimi korporativ və qrup tədbirlərinin keçirilməsi üçün də təkliflərin mövcud olduğu yerdir. Hətta Azərbaycanda hind kinolarının çəkilişini dəstəkləyəcək qaydalar müəyyənləşdirən sənəd üzərində iş getdiyi haqqında məlumat verib.

Qeyd edək ki, Azərbaycan nümayəndə heyəti Azərbaycan Turizm Bürosunun rəhbərliyi ilə yanvarın 16-dan 18-dək Nyu-Dehli şəhərində keçirilən “SATTE 2019” beynəlxalq sərgisində iştirak edib.