İndoneziyalılara Ümrə ziyarətinə Azərbaycandan getmək təklif olunub

İndoneziyalı turistlərin Azərbaycana cəlb edilməsi üçün onlara turpaketlər təqdim edilib. Ümrə ziyarət paketlərinin də əlavə edilməsi təklif olunub.

Bu barədə oktyabrın 8-də İndoneziya Respublikasının Azərbaycandakı səfirliyində Dövlət Turizm Agentliyinin və Xarici İşlər Nazirliyinin birgə təşkilatçılığı ilə keçirilən videokörpüdə deyilib.

Dövlət Turizm Agentliyindən bildirilib ki, videokörpüdə indoneziyalı turistlərin Azərbaycan və onun görməli yerləri haqqında daha geniş məlumatlandırılıb. İndoneziyanın turizm şirkətləri üçün tanışlıq səfərlərinin təşkili də müzakirə olunub.

Videokörpüdə Dövlət Turizm Agentliyi və Azərbaycan Turizm Bürosu ilə yanaşı, Azərbaycan Turizm Agentlikləri Assosiasiyası, Azərbaycan Hotellər Assosiasiyası və Azərbaycan Xarici İşlər Nazirliyinin nümayəndələri iştirak edib. Həmçinin qarşı tərəfdən isə İndoneziyanın Turizm Nazirliyinin, Dini İşlər və Xarici İşlər Nazirliyinin nümayəndələri də burada olub.