Ev Turizm Xəbərləri Virus təyyarə biletləri qiymətini də “vurub”

Virus təyyarə biletləri qiymətini də “vurub”

Koronavirus dünya turizminə çox böyük zərbə vurub. İnsanlar səyahət hayında deyil. Dünya turizminin mərkəzlərindən sayılan İtaliyada xeyli şəhər karantindədir.

Bizimyol.info xəbər verir ki, virus təyyarə biletləri qiymətinə də çox təsir göstərib. İtaliyadan başlayaq. Bakıdan paytaxt Romaya getmək heç vaxt bu qədər ucuz görünməmişdi. Məsələn, 1-8 aprel tarixlərindəki ora və geri biletini sizə bir çox aviaşirkətlər təxminən 400 manata təklif edər. Hələ söhbət loukosterlərdən getmir. Bir neçə uçuşla qiyməti lap aşağı salmaq olar.

Parisə səyahət bir az baha başa gələr. Hərçənd əvvəlcə “Wizzair”lə Budapeştə uçmaq qiyməti lap ucuzlaşdırardı. Koronavirus Fransanı hələ tam iflic etməyib. Hər halda vəziyyət İtaliyadakı kimi deyil. Yəni Parisə səyahətin tam zamanıdır.

Əsl fərqi uzaq reyslərin qiymətlərinə nəzər salanda hiss etmək olur. Yaxın bir ay ərzində Yaponiyanın paytaxtı Tokioya gedib-gəlmək uzağı 450 dollara başa gələr. Vaxt var idi 800-900 dollarlıq biletlər müzakirə olunurdu.

Bir az da uzağa “gedək”. Götürək Argentinanın paytaxtı Buenos-Ayresi. Bakıdan ora və geri təyyarə biletini 600 dollardan bir az baha əldə etmək mümkündür. Halbuki əvvəllər dördrəqəmli bilet qiymətlərindən söhbət gedirdi. Düzdür, birbaşa uçmursunuz, amma yenə də çox sərfəli variantdır. Nəzərə alaq ki, bu Cənubi Amerika ölkəsində hələ koronavirus qeydə alınmayıb. Deməli, səyahət üçün əla imkandır.