PAYLAŞ
“Şahdağ” Turizm Mərkəzi

Yay mövsümü başlayandan “Şahdağ” Turizm Mərkəzinin xidmətlərindən 10 mindən çox turist faydalanıb.

Turistlər daha çox paraplanla uçuş, kanat xəttində gəzinti, kvadrasikl sürmək, uşaq macəra parklarından istifadə ediblər.

Əyləncə-istirahət kompleksləri arasında özünəməxsus xidmətləri ilə seçilən mərkəzdə bu yay mövsümündə də turistlər üçün fərqli istirahət, əyləncə və gözəl təbiətdən zövq almaq imkanı yaradılıb.

“Şahdağ” Turizm Mərkəzi

Mərkəzin marketinq departamentinin rəhbəri Rauf Cahangirov AZƏRTAC-məlumat verib. Yay mövsümü başlayandan kompleksin otellərində 5 mindən çox insan istirahət edib.

Yay günlərində sərin havası və füsunkar təbiəti ilə seçilən “Şahdağ” Turizm Mərkəzində turistlər üçün 20-yə yaxın müxtəlif əyləncə və idman oyunu nəzərdə tutulub. Mərkəzə gələn qonaqlara macəralar parkı, kvadrosikllər, seqvey, zip-layn, trotinnet, bob kart, dağ velosipedi, peyntbol, atla gəzinti və sair xidmətlər təklif olunur. Bu idman növlərindən istifadə etmək üçün təcrübəli təlimatçılar turistlərə kömək edirlər. Burada kiçik yaşlı uşaqların (12 yaşa qədər) nəzarət altında əylənməsi üçün xüsusi qalalar da qurulub.

“Şahdağ” Turizm Mərkəzi

Mərkəzdə, həmçinin həftəsonu musiqi sədaları altında pikniklər və digər maraqlı əyləncələrin keçirilməsi üçün əlverişli şərait yaradılıb.