Ev Turizm Xəbərləri Bölgələrdə xidmət səviyyəsinin artırılması üçün təlimlər keçirilir

Bölgələrdə xidmət səviyyəsinin artırılması üçün təlimlər keçirilir

turizm

Almaniya Beynəlxalq Əməkdaşlıq Cəmiyyəti (GIZ) və Dövlət Turizm Agentliyi tərəfindən Qəbələ, İsmayıllı və Qax şəhərlərində xidmət sahəsində çalışan işçilər üçün təlimlər təşkil olunur.

Dövlət Turizm Agentliyindən AZƏRTAC-a bildirilib ki, təlimlər Almaniya Beynəlxalq Əməkdaşlıq Cəmiyyətinin Avropa İttifaqının maliyyə dəstəyi ilə həyata keçirdiyi “Qəbələ, İsmayıllı və Qax rayonlarının kənd təsərrüfatı və turizm sahələrində Dual Peşə Təhsili və Təlimi pilotlarının yaradılması” (EDVET) qrant layihəsi çərçivəsində keçirilir.

Ofisiantlar üçün nəzərdə tutulan təlimlər bu gün başlayıb və noyabrın 29-dək davam edəcək. Mehmanxana qeydiyyatçıları üçün isə dekabrın 4-6-da baş tutacaq.

Qeyd edək ki, bundan əvvəl ilkin mərhələdə sözügedən bölgələrdə kiçik və orta sahibkarlıq subyektlərinin inzibati heyətlərinə 2 günlük təlimlər keçirilib.

Təlimlər turizm sektorunda göstərilən xidmətlərin yaxşılaşdırılması üçün kiçik və orta sahibkarlıq subyektlərində çalışan işçi heyətin bilik və səriştələrinin artırılmasını hədəfləyir. Eyni zamanda, turizm sahəsində çalışan nümayəndələrin turizm sektorunun xüsusiyyətlərini öyrənməsinə, eləcə də peşə bacarıqlarının artırılmasına dəstəyi nəzərdə tutur.