Ev Turizm Xəbərləri “Inforadio” ictimai radiosunun jurnalisti Azərbaycanla bağlı təəssüratlarını bölüşüb

“Inforadio” ictimai radiosunun jurnalisti Azərbaycanla bağlı təəssüratlarını bölüşüb

Inforadio

“Inforadio” ictimai radiosunun “Unterwegs” verilişinin internet səhifəsində adıçəkilən kanalın əməkdaşı Oliver Şooşun (Oliver Soos) Azərbaycana səfərini təsvir edən reportaj (https://www.inforadio.de/) yerləşdirilib.

Jurnalistin Azərbaycanla tanışlığı onun Qobustan Milli Tarix-Bədii Qoruğuna səfəri ilə başlayır. O, paytaxt Bakı şəhərindən 60 kilometr məsafədə yerləşən Qoruğun UNESKO-nun Dünya İrsi siyahısına daxil edildiyini, burada qədim incəsənət nümunələrinin olduğunu dinləyicilərin nəzərinə çatdırır. Qoruğun ərazisində 14-16 min il tarixə malik olan altı mindən çox qayaüstü rəsmin olduğunu qeyd edən Şooş, buradakı rəsmlərin döyüş, ritual rəqs səhnələrini, dəvə karvanlarını, günəş və ulduzları əks etdirdiyini bildirir.

Qobustandan sonra Bakı ətrafında yerləşən palçıq vulkanlarını ziyarət edən jurnalist dünyadakı təqribən 800 palçıq vulkanından 300-nün Azərbaycanda yerləşdiyini diqqətə çatdırır. Palçıq vulkanlarından birinin üzərinə çıxan Şooş onu təsvir edir. Vulkanın mərkəzindən təbii qazın çıxdığını qeyd edir. Səfər zamanı onu müşayiət edən azərbaycanlı bələdçi palçıq vulkanından çıxan palçığın insan üçün faydasından söz açır və ondan kosmetik məhsullarının istehsalında geniş istifadə edildiyi vurğulayır.

Səfərini Bakı şəhərində başa vuran Şooş şəhəri təsvir edərkən onun valehedici olduğunu bildirir. Bakıda Dənizkənarı Bulvar boyunca inşa edilmiş müasir göydələnlərin Dubay şəhərini, şəhərin mərkəzinin Parisi, qədim içərişəhərin isə Qüdsü xatırlatdığını nəzərə çatdırır. Dinləyicilərə bura səfər etməyi tövsiyə edir.