2019-cu ildə ən gəlirli sahə turizm olacaq. Bunu iqtisadçı Elman Sadıqov deyib.

Ekspertin sözlərinə görə, turizm sahəsində olan boşluqlar, xüsusilə də xidmət sektorunda peşəkarlara duyulan ehtiyac bu sahəyə investisiya yatıranlara böyük gəlir gətirə bilər:

“Kiçik və orta miqyaslı hostel, iki ulduzlu hotel, həmçinin 10-20 otaqlı qonaq evləri açmaqla turizm sahəsinə daxil olmaq və yüksək xidmətlə turist, qonaq cəlb edib qazanc götürmək mümkündür. Əsas məsələ gələn turisti razı salmaq və müsbət imic yaratmaqdır. Belə olduqda gəlirlər də artacaq”.

E.Sadıqov bildirib ki, turizm dövlət üçün prioritet təşkil edən sahələrdəndir:

“Bununla çox adam məşğul ola bilər. Xidmət sektorunda orta seqmentə daxil olan obyektlərin sayı azdır. Söhbət restoran və kafelərdən gedir. Burada daha çox lüks seqment 5 ulduzlu otellər, bahalı restoranlar fəaliyyət göstərir. Xidmət sektorunda orta seqmentin tələblərinə cavab verən iaşə obyektlərinə ehtiyac var”.

İqtisadçının fikrincə, gəlir üçün kənd təsərrüfatı sahəsinə də üz tutmaq olar, lakin bu, ağır və gərgin əmək tələb edir.

“Aqrar sahədə peşəkar olmaq vacibdir. Kənd təsərrüfatına pul qoyub kənarda durmaq doğru deyil. O pulun necə itirilməsini sərmayəçi özü də müəyyən edə bilməz. Kənd təsərrüfatı spesifik sahədir. Bu sahəyə bələd olmadan investisiya yatırmaq risk tələb edir. Bu sahə mənfəətlidir, bir şərtlə ki kənd təsərrüfatı ilə peşəkar insanlar məşğul olsun”.

E.Sadıqov vurğulayıb ki, hazırda gəlirli sahələrdən biri də ailə biznesi hesab olunur:

“Malayziyadan tutmuş Yaponiyaya qədər, Tayvan, İndoneziya və bu kimi ölkələrdə ailə biznesləri böyük müvəffəqiyyət qazanıb. Hazırda Avropada tanınan böyük brendlərin əksəriyyəti kiçik ailə biznesindən yaranıb. Bu mənada ölkəmizdə ABAD layihəsi həyata keçirilir və bu, olduqca müsbət bir haldır. Düşünürəm ki, hər bir vətəndaş ABD mərkəzlərinə müraciət edərək öz kiçik ailə biznesini qura bilər. Bu, bəsit səslənsə də, olduqca vacib məsələdir”.

Ekspert əlavə edib ki, hazırda populyar sahə sayılan kriptovalyutalara investisiya yatırmaq riskli ola bilər:

“Əgər kiməs maliyyə bazarlarında kriptovalyutalara investisiya yatırmağı düşünürsə, ehtiyatlı olmalıdır. Bu sahədə itki riski də böyükdür”.

Azərbaycanın turizm potensialının Avropada tanıdılması üçün təbliğat işləri aparılır.

Mayın 6-da Azərbaycanın Avropada turizm potensialının təbliği məqsədilə Almaniyadan olan turoperatorlarla yerli turizm şirkətlərinin nümayəndələri arasında tanışlıq görüşü baş tutub.

150-dən çox yerli şirkətin iştirak etdiyi görüşdə alman şirkətləri ilə əməkdaşlıq imkanları müzakirə olunub. Gələcək tərəfdaşlıq üçün ikitərəfli müzakirələr aparılıb.

Berlin, Frankfurt, Münhen, Bremen və Köln şəhərlərindən olan alman şirkətlərinin Azərbaycan haqqında ətraflı məlumatlandırılması məqsədilə Bakı və regionlara tanışlıq səfərləri təşkil olunub.

3-7 may tarixlərində Azərbaycan Turizm Bürosunun təşkilatçılığı səfər baş tutub. Bakı, Qəbələ, Şamaxı və Şəkinin turizm məkanlarını ziyarət edilib. Şərabçılıq və kələğayı istehsalı ilə bağlı tarixi ənənələr haqqında məlumat verilib.

Əsasən təbiət və mədəniyyət turizmi üzrə ixtisaslaşmış turoperatorların alman turistlərə təklif etdikləri səyahət paketlərinə bu il və gələn il üçün Azərbaycanın ayrıca bir istiqamət kimi daxil edilməsi planlaşdırılır.

Qeyd edək ki, 2018-ci ilin sonundan etibarən Almaniyanın Münhen şəhərində ölkəmizin rəsmi turizm nümayəndəliyi fəaliyyət göstərir.