Bu günlərdə nüfuzlu beynəlxalq audit və məsləhət şirkəti olan UHY öz səhifəsində Azərbaycanla bağlı məlumat yayımlayıb.

“UHY Avrasiya bazarında öz iştirakını gücləndirib.

Avrasiya regionunda əhatə dairəmizi genişləndirərək Azərbaycandakı yeni tamhüquqlu üzvümüz olan “M.A. Audit” MMC-ni, onun törəmə şirkəti “MA Konsaltinq” MMC ilə birlikdə, UHY qlobal mühasibatlıq şəbəkəmizdə salamlayırıq. Bu firmalar hal-hazırda UHY brendinin qəbulu mərhələsindədirlər və tezliklə “UHY Audit” MMC və “UHY” MMC kimi tanınacaqlar.

2009-cu ildə təsis edilmiş, beş partnyor da daxil olmaqla 19 əməkdaşdan ibarət bu heyət paytaxt Bakı şəhərində fəaliyyət göstərir. Heyət əsasən aviasiya, gündəlik tələbat malları (FMCG), neft-qaz və turizm sahələrində təmsil olunan daxili və beynəlxalq müştərilərin portfelinə audit, mühasibat uçotu, konsaltinq və vergitutma sahəsində geniş təcrübə gətirir.

İdarəedici Partnyor Teymur Nağıyev bunu belə şərh edib: “Nüfuzlu UHY brendi altında UHY şəbəkəsi ilə əməkdaşlıq firmamıza Azərbaycanda və daha geniş regionda rəqabət üstünlüyü qazandıracaqdır. Şəbəkənin qlobal arenada mövcudluğu bütün dünyada 8200 insanın malik olduğu UHY təcrübəsi və bilikləri ilə birlikdə nəinki bizim yerli və beynəlxalq səviyyədə imkanlarımızı genişləndirir, eləcə də müştərilərimizin və onların əməliyyat imkanlarını artırır. Biz UHY şəbəkəsi daxilində fəaliyyət göstərən digər firmalarla uğurlu əməkdaşlıq vasitəsilə biznesimizi yüksəklərə qaldıracağımıza ümid edirik.”

UHY direktoru Rik Devid: “Biz “UHY Audit” MMC və onun törəmə şirkətini UHY şəbəkəsində böyük məmnuniyyətlə salamlayırıq. Müstəqil Dövlətlər Birliyinin (MDB) üzvü olan Azərbaycan hələ də iqtisadi artıma təkan verən əsas mənbələrdən biridir. Enerji sektorunda baş verən iqtisadi dəyişiklikləri qəbul etməyə davam edir. “UHY M.A. Audit” MMC-nin üzvlüyü Avrasiya regionunda iştirakımızı genişləndirir və regional bazar təcrübəsini və bu ölkədə və daha geniş regionda sərmayə və biznes iştirakı olan beynəlxalq müştərilərimizə xidmət göstərmək üçün UHY imkanlarını gücləndirir”.

İyulun 1-də Azərbaycan Turizm və Menecment Universitetində (ATMU) Azərbaycan Dövlət Turizm Agentliyinin rəhbəri Fuad Nağıyev və Özbəkistan Respublikasının Baş Nazirinin müavini Əziz Abduxakimov arasında görüş keçirilib.

Görüş çərçivəsində tərəflər arasında turizm sektorunda olan görülən işlər, problemlər və gələcək planlar haqqında müzakirələr aparılıb.

Diskussiya zamanı Əziz Abduxakimov bildirib ki, Özbəkistan MDB ölkələr sırasında Gürcüstandan sonra vizasiz rejimə görə ikinci yerdə dayanır. Müavin, həmçinin təhlükəsizlik məsələlərinə də toxunub. Qeyd edib ki, ölkəsinin dörd əsas şəhərində turistlərin təhlükəsizliyini təmin etmək üçün turist polisi yaradılıb. Qonşu ölkələrlə problemləri olmadığını söyləyən Ə.Abduxakimov Özbəkistanın dünyanın təhlükəsiz ölkələri sırasında dayandığını vurğulayıb.

Fuad Nağıyev öz növbəsində Azərbaycanda turizm sektorunda görülən işlərdən danışıb. Qeyd edib ki, ötən ildən Turizm Agentliyi müstəqil qurum kimi fəaliyyətə başlayıb. Hazırda bu qurumun tabeçiliyində ATMU, Milli Kulinariya Mərkəzi, bir neçə tarixi məkan fəaliyyət göstərir. Hazırda Avstriyanın turizmlə bağlı təhsil ocaqlarının birinin Bakıda açılması ilə bağlı danışıqlar aparılır. Ötən il ölkəyə iki milyondan artıq turist gəldiyini söyləyən F.Nağıyev tək “Yanardağ” Dövlət Tarix-Mədəniyyət və Təbiət Qoruğunu 20 min turistin ziyarət etdiyini bildirib. Qeyd olunub ki, prioritet turist axını olan ölkələr Rusiya, Gürcüstan və İrandır.

Sonda ATMU və Özbəkistan Respublikasında fəaliyyət göstərən Beynəlxalq İpək Yolu Turizm Universiteti arasında əməkdaşlıq memorandumu imzalanıb.