Azərbaycandan Türkiyəyə gedən turistlərin sayı açıqlanıb
Qeyd edək ki, 2019-cu ildə Azərbaycandan Türkiyəyə 901 723 turist səfər edib ki, bu da 2018-ci illə müqayisədə 5,03 faiz çox olub. Bu dövr ərzində Türkiyəyə gələn xarici vətəndaşların ümumi sayında Azərbaycan vətəndaşlarının payı 2 faiz təşkil edib.
Misir Prezidenti koronavirusla mübarizəyə 6 milyard dollardan çox vəsait ayırıb
Misir Prezidenti Əbdülfəttah əs-Sisi koronavirus pandemiyası ilə bağlı keçirdiyi müşavirədə ölkə vətəndaşlarını xəstəliyin yayılmasının qarşısını almaq üçün daha iki həftə ərzində qaydalara riayət etməyə çağırıb.
Dövlət başçısı yerli telekanallarda canlı yayımlanan tədbirdə geniş nitq söyləyib. COVID-19-un yayılmasının qarşısını almaq məqsədilə 100 milyard Misir funtu (6,39 milyard dollar) ayrıldığını bəyan edib.
O bildirib ki, turizm obyektlərinin, digər müəssisələrin fəaliyyətinin dayandığı, habelə aeroportların bağlandığı bir vaxtda ölkənin fond birjasının dəstəklənməsi məqsədilə Misir Mərkəzi Bankı əlavə 20 milyard Misir funtu (1,28 milyard dollar) ayıracaq.
Misir Prezidenti qeyd edib ki, COVID-19 çox sürətlə yayılır. Qısa zamanda minlərlə insan bu virusa yoluxa bilər. O, əhalini qaydaları pozan obyektlər barədə hökumətə məlumat verməyə çağırıb.
Əbdülfəttah əs-Sisi vurğulayıb ki, dövlətin kifayət qədər maliyyə və ərzaq imkanları var. Vətəndaşlar ev karantinində də əziyyət çəkməyəcəklər. Vurğulanıb ki, Misir ən azı üç aylıq ərzaq ehtiyatına malikdir.
Misirdə koronavirusdan ölənlərin sayı 6 nəfərə çatıb
Son iki gün ərzində Misirdə daha iki nəfər koronavirus səbəbindən həyatını itirib.
AZƏRTAC Misir Səhiyyə Nazirliyinin məlumatına istinadla xəbər verir ki, həyatını itirənlər 78 yaşlı İtaliya vətəndaşı və 70 yaşlı Qahirə sakinidir. Beləliklə, ölkədə COVID-19 virusundan ölənlərin sayı 6 nəfərə çatıb.
Məlumatda qeyd olunur ki, martın 17-də Misirdə koronavirusa 30 yoluxma faktı qeydə alınıb. COVID-19 virusuna yoluxanların ümumi sayı isə 196 nəfərdir. Ölkənin xəstəxanalarında koronavirus müayinəsi aparan daha 6 laboratoriya açılıb. Son iki gündə səhiyyə müəssisələrinə qızdırma şikayəti ilə müraciət edən 34 nəfərdə isə koronavirus aşkarlanmayıb.
Misir hökuməti pandemiyanın qarşısını almaq məqsədilə turizm sektorunun fəaliyyətini dayandırıb. Otellərdə dezinfeksiya işləri aparılır, məscidlərdə cümə namazı da daxil olmaqla, kütləvi ibadət qadağan edilib, kinoteatr, konsert zalları və aeroportlar bağlanılıb. Bundan başqa, hökumət tibbi spirt və maskaların ixracını dayandırıb.
Dubay turistlərə və yerli sakinlərə onlayn xidmət təqdim edir
Dubay Əmirliyinin Mədəniyyət və İncəsənət Departamenti turistlər və yerli sakinlər üçün “Dubai360.com” internet saytı vasitəsilə alternativ muzey xidməti təqdim edir.
Bu onlayn platformada şəhərin panoramı və görməli məkanları ilə ətraflı tanış olmaq olar.
Departamentin rəhbərliyi bildirib ki, xidmətin yaradılmasında əsas məqsəd koronavirus pandemiyası ilə əlaqədar turistik məkanların və muzeylərin bağlanıldığı bir vaxtda şəhərin qonaqları və sakinlərinə mədəni irsin təbliğ edilməsidir.
İnternet saytında videomateriallar və fotoşəkillər vasitəsilə Dubayın ən gözəl məkanları və mədəniyyət obyektlərini görmək mümkündür. O cümlədən Etihad Muzeyi, Əl Fəhidi Tarix Qoruğu, Numizmatika Muzeyi, qədim abidələr və müasir turizm məkanlarına onlayn səyahət etmək olar. Muzey eksponatları arasında görkəmli Səudiyyə şairi Əl Oqalli, Dubay şəhərinin əsasını qoyan Şeyx Rəşidin ev-muzeyi də var. Bundan başqa, onlayn xidmət vasitəsilə Əmirliyin ən qədim məkanı olan Əl Fəhidi qalasına da virtual səyahət təşkil edilir.
Dövlət Turizm Agentliyinin sədri turizm sənayesinin nümayəndələrinə müraciət edib
Dövlət Turizm Agentliyinin sədri Fuad Nağıyev turizm sənayesinin nümayəndələrinə müraciət edib.
Gezmeli.az xəbər verir ki, müraciətdə bu günlərdə dünyanın bir sıra çətinliklərlə üz-üzə qaldığı, COVID-19 virusunun yayılmasının bütün dövlətlərin sərhədlərinin bağlanmasına səbəb olduğu, habelə bir çox ölkələrin iqtisadiyyatına zərbə vurduğu qeyd olunur.
Müraciətdə deyilir: “Böhran nəticəsində dünya turizm sənayesi ən çox zərər görən sahələrdən biri oldu. Belə ki, bütün dünya üzrə hotellər bağlanır, turizm agentlikləri, sahibkarlar iflasa uğrayır, işçilər ixtisara salınır. Təəssüf ki, qlobal turizm sənayesinin bir hissəsi olmaqla Azərbaycanın turizm sahəsi də itkilər vermək məcburiyyətində qalır. Biz ümumi vəziyyətdən xəbərdarıq, sənayedən daxil olan, həmçinin sizinlə mütəmadi keçirdiyimiz görüşlər zamanı aldığımız məlumatlara əsasən Azərbaycanda turizm biznesində proseslərin müvəqqəti olaraq dayandırılması və işçilərin ixtisar edilməsi faktları ilə tanışıq. Əlbəttə, bu, çox ağır və təəssüfləndirici haldır. Hələ ilin əvvəlində Prezident İlham Əliyev turizm sahəsinin neft-qaz sənayesindən sonra iqtisadiyyatın ikinci gəlirli sahəsi olduğunu vurğulayaraq uğurlarımızı qeyd etmişdi. Biz birgə səylərimizin nəticəsində ildən-ilə Azərbaycana daha çox turistin cəlb olunmasına, ölkədə daxili turizmin inkişafına, infrastrukturun genişlənməsinə və ən əsası yüksək ixtisaslı kadrların hazırlanmasına nail olmuşuq. Hazırkı qlobal böhrandan da, bu çətin vəziyyətdən də məhz birgə səylərimiz nəticəsində çıxa bilərik.
Hər kəsə məlumdur ki, turizm sahəsi Prezident İlham Əliyevin və Birinci vitse-prezident Mehriban xanım Əliyevanın daim xüsusi diqqət və qayğı göstərdiyi bir sahə olub və olmaqda da davam edir. Biz həmişə hər sahədə bu dəstəyi hiss etmişik və inanırıq ki, yenə hiss edəcəyik.
Tətbiq edilən məhdudlaşdırıcı tədbirlərin təsiri nəticəsində sahibkarlara dəyə biləcək itkilərin minimuma endirilməsi üçün dövlət başçısı tərəfindən hökumət strukturlarına yaxın günlərdə təkliflər paketinin hazırlanması tapşırılıb.
Prezident İlham Əliyevin tapşırıqları çərçivəsində Azərbaycan Respublikası Dövlət Turizm Agentliyi tərəfindən də digər dövlət strukturları ilə birgə Azərbaycan turizm sənayesinin dəstəklənməsi üzrə təkliflər paketi hazırlanaraq hökumətə təqdim edilib.
Hazırda hamımız üçün ən əsas amil bu sahədə fəaliyyət göstərən hər kəsi dəstəkləməkdir. Təbii ki, yüksəkixtisaslı kadrların itkisi bizim sənaye üçün böyük ziyan deməkdir. Biz buna yol verə bilmərik. Biz – dövlət sektorunun təmsilçiləri və siz – sahibkarlar bu günlərdə vəziyyətin və qəbul edilmiş qərarların məsuliyyətini anlayaraq davranmalı, turizm sənayesinin, ölkənin və vətəndaşların rifahı naminə birlikdə olmalıyıq. Buna görə də hər birinizi bu və ya digər qərarları qəbul edərkən sosial məsuliyyəti dərk edərək addım atmağa səsləyirik. Sevindirici haldır ki, artıq bir sıra sahibkarlar iş yerlərinin saxlanması ilə bağlı bizim tövsiyələri nəzərə almaq barədə qərar qəbul ediblər. Qeyd etməliyik ki, XXI əsrin əvvəllərindən dünya turizm sənayesi artıq bir neçə dəfə qlobal böhranla üzləşib. 2001-ci ilin 11 sentyabr hadisələrindən sonrakı dövrü, 2003-cü ildə SARS epidemiyasını, həmçinin 2009-cu ildə qlobal iqtisadi böhranı buna misal çəkmək olar. Azərbaycanın turizm sahəsi çox gənc olduğundan biz hələ bu cür böhran vəziyyətlərdən keçməmişik. Ancaq yeni dünya sistemi göstərir ki, hər böhrandan sonra turizm bərpa olunur və daha da sürətlə inkişaf edir. Şübhəsiz, bu dəfə də belə olacaq. Böhran mütləq surətdə keçəcək. Biz bu böhrandan birgə səylərimiz nəticəsində çıxacağıq. Əlbəttə, biz peşəkar kadrlarımızı qoruyub saxlaya bilsək, bu proses daha effektiv olmaqla daha qısa müddətdə baş verəcək”.
Sonda Fuad Nağıyev turizm təmsilçiləri və turizm sənayesinin üzvlərini Novruz bayramı münasibətilə təbrik edib.
Birləşmiş Ərəb Əmirliklərində turizm obyektlərinin fəaliyyəti dayandırılıb
Birləşmiş Ərəb Əmirliklərinin (BƏƏ) Əbu-Dabi Mədəniyyət və Turizm Departamenti COVID-19 yeni növ koronavirusun yayılmasının qarşısını almaq məqsədilə bütün turizm şirkətlərinə təlimat göndərib.
Gezmeli.az xəbər Azərtca istinadən xəbər verir ki, təlimatda bütün kruizlər, səhra düşərgələri, safari və üzən restoranların qadağan edildiyi bildirilir.
Departamentin məlumatında qeyd olunur ki, təlimat dərhal qüvvəyə minir və növbəti göstəriş verilənə qədər ona əməl olunmalıdır. Həmçinin bildirilir ki, BƏƏ-nin bütün sakinlərinin, turistlərin və sektorun əməkdaşlarının sağlamlığını və təhlükəsizlini təmin etmək məqsədilə sənədin icrasına nəzarəti xüsusi müfəttiş qrupu həyata keçirəcək.
“Bütün turizm operatorları bu qadağaya ciddi şəkildə əməl etməlidir. Təlimatın şərtlərinin pozulması qeydə alındıqda isə şirkətlərə cərimələr tətbiq ediləcək“, – deyə məlumatda vurğulanır.
Malta aeroportu sərnişin reysləri üçün qapadılıb
Malta aeroportu martın 20-dən etibarən daxil olan bütün sərnişin reysləri üçün qapadılıb. Bundan sonra müvəqqəti olaraq ancaq yük, humanitar məqsədli və vətənə uçuşlar saxlanılıb.
AZƏRTAC xəbər verir ki, əsas gəlirləri turizm üzərində qurulan ölkədə bu günədək 38 koronavirus yoluxması faktı qeydə alınıb ki, bunlardan da 32-si xəstəliyi kənardan gətirib.
Aeroportun bağlanması və turistlərin gəlməsinə qoyulan qadağa ölkə iqtisadiyyatına çox ciddi ziyan vuracaq. Ümumdaxili məhsulunun dörddəbirinin turizm gəlirlərindən formalaşan ölkə üçün bu itkilər ağırdır və bu, kütləvi işsizlik deməkdir. Proqnozlara əsasən, növbəti ildə isə ölkə iqtisadiyyatı iki dəfə azalacaq.
Maltanın İqtisadiyyat naziri Silvio Şembri parlamentdəki çıxışı zamanı dediyi “xarici işçilər ölkələrinə qayıtmalıdırlar” sözləri ilə də tənqidlərə məruz qalıb. Nazir parlamentdə bunları demişdi: “Biz xeyriyyəçi deyilik. Ona görə də, ilk növbədə, Malta vətəndaşlarının aqibətini düşünməliyik. Xarici işçilər isə ölkələrinə qayıtmalıdır”. Daha sonra tənqidlərlə qarşılaşan nazir sözləri üçün üzr istəyərək bildirib ki, qanuni əmək müqaviləsinə sahib olan xaricilər deport olunmayacaq.
AYİB koronavirusun təsirini azaltmaq üçün 1 milyard avro ayırır
Avropa Yenidənqurma və İnkişaf Bankı (AYİB) koronavirusun (COVİD 19) yayıldığı ölkələrdə virusun şirkətlərə təsirini azaltmaq üçün 1 milyard avro dəyərində “Həmrəylik Paketi” elan edib.
“Report” bu barədə banka istinadən xəbər verir.
Bankın açıqlamasında bildirilib ki, bu addım böhrana ilkin cavabdır və lazım olduqda qurum daha çox tədbir görməyə hazırdır. “Həmrəylik Paketi” əsasən 38 inkişaf etməkdə olan ölkənin özəl sektorun inkişafı dəstəklənib. Həmin ölkələrə investisiya qoyan bankın səhmdarları tərəfindən təsdiqlənib.
Məlumata görə, təcili yardım proqramı çərçivəsində AYİB müvəqqəti kredit çətinliyi yaşayan güclü iş imkanlarına malik mövcud müştərilərinin maliyyələşməsini təmin etmək üçün “dayanıqlıq çərçivəsi” yaradacaq.
“COVİD 19 pandemiyası və onun iqtisadi nəticələri AYİB və onun fəaliyyət göstərdiyi ölkələr üçün misli görünməmiş bir çətinlik yaradır. Səhmdarları, üzv ölkələri, tərəfdaşlar və müştərilərin həmrəyliyinə cavab vermək üçün bank mövcud müştərilər üçün fövqalədə likvidlik, dövriyyə kapitalı və ticarətin maliyyələşməsini daxil olmaqla 1 milyard avro əlavə maliyyələşməni təmin edən bir çərçivə yaratdı. Bu ilk addımdır. Bank cavab tədbirlərini daha da genişləndirməyə hazırdır və fəaliyyət göstərdiyi ölkələr, beynəlxalq ictimaiyyətlə əməkdaşlıq çərçivəsində maliyyələşdirmə alətlərini nəzərdən keçirmək, tənzimləmək və genişləndirmək üçün fəal və təxirəsalınmaz addımlar atır”, – AYİB prezidenti Suma Çakrabarti deyib.
Yardım paketi çərçivəsində xüsusən kiçik və orta sahibkarlığı dəstəkləmək üçün ticarətin maliyyələşdirməsi genişləndiriləcək. Maliyyə qurumları vasitəsi ilə iki ilə qədər qısamüddətli maliyyələşdirmə təmin ediləcək. Bundan başqa, Bank, digər şirkətlər, enerji subyektləri üçün iki ilədək qısamüddətli dövriyyə vəsaitləri təmin edəcək. Həmçinin bələdiyyə, enerji və infrastruktur subyektlərinin balansın yenidən qurulması və qısamüddətli likvidlik dəstəyi verməyə hazırdır.
AYİB mövcud kreditlərin yenidən təşkili, həmçinin ödəmə müddətinin uzadılması və digər kredit şərtləri dəyişdiriləcək. Yerli valyuta ilə ödəmə qabiliyyətindən istifadə edilməsi imkanlarını qiymətləndirəcək.
Ekspertlər qeyd edib ki, bu qərarla AYİB ötən il 10,1 milyard avro investisiya yatırdığı analoji ölkələrə güclü maliyyə dəstəyi verəcəyini göstərir. Xüsusən Orta Asiya, Şərqi Avropa, Qafqaz, Rusiya, cənub-şərqi Avropada iqtisadi artım zəifləyib.
Qlobal tədarük zəncirinə yüksək səviyyədə inteqrasiya olunan və xüsusilə Çin və Avropadan birbaşa asılılığı olan ölkələr virusdan daha çox əziyyət çəkir. Sektorlar üzrə isə AYİB-ə üzv ölkələrdə ən çox turizmə zərər dəyəcəyi gözlənilir.
Neftin qiymətindəki son azalma ilə AYİB-ə üzv neft istehsal edən ölkələrə ciddi təsir edəcək. Neft sektorunda işləyən işçilərin öz ölkələrinə pul köçürmələrinin həcminin azalması gözlənilir.
Turizm sektoruna müddətli vergi güzəştlərinin verilməsi təklif olunur
Xəbər verildiyi kimi Gürcüstan hökuməti koronavirusa görə dəyən zərərin azaldılması məqsədi ilə hotel, restoran, turizm agentlikləri və turoperatorları 4 ay müddətinə (mart, aprel, may, iyun) gəlir və əmlak vergilərindən azad edilib.
Koronavirusla bağlı Azərbaycanda da daxili və xarici turist axınının azaldığı, əvvəlcədən sifariş verilmiş turların və otel rezervasiyaları ləğv olunub. Xüsusilə də Novruz Bayramı ilə əlaqədar tədbirlərin təxirə salınması səbəbindən turizm sektorunun müəyyən gəlirlərini itirdiyi məlumdur.
Turizm üzrə ekspert Ceyhun Aşurov Bizimyol.info-ya açıqlama verib. O bildirib ki, bu məsələ ilə bağlı Kiçik və Orta Biznesin İnkişafı Agentliyinda dünyada yayılmış koronavirus infeksiyasının Azərbaycanın turizm sektoruna təsirinin öyrənilməsi məqsədilə bu sahədə fəaliyyət göstərən sahibkarlarla görüş keçirilib.
“Görüşdə turizm obyektlərindən tutulan vergilərin və sosial sığorta haqlarının güzəştlərin tətbiq edilməsi və ya iyun ayına qədər azad edilməsi təklif olundu. Koronavirusa qarşı mübarizədə Azərbaycanın imicini möhkəmləndirmək üçün işi aparılmalıdır. Xüsusən, sərhəd buraxlış məntəqələrində virusa qarşı mübarizəni əks etdirən görüntülərin paylaşılması məqsədə uyğundur. Biz əcnəbilərə ölkəmizdə virusun yayılması üçün heç bir şəraitin yaradılmadığı nümayiş etdirməliyik. Biz bunu etməsək hava reyslərinin açıq olduğu ölkələrdən turistlər bizə ehtiyatla gələcəklər. Yəni virusla doğru şəkildə mübarizə apardığımızı göstərməliyik”,-deyə ekspert Ceyhun Aşurov bildirib.
Ekspert bildirib ki, son üç ildə rezervasiya xidmətlərinə görə onlayn saytlara edilən ödəniş üçün əlavə vergi tələb olunur. “Virusla bağlı vəziyyətin gərgin davam etdiyi müddətdə bu vergilərin tutulmasının dayandırılmasını təklif edirik”.
Ceyhun Aşurov dövlətin kommunal xidmətlərinin sabit xərclərinin ödənilməsində sahibkarlara dəstək olmasını və borclu olan sahibkarların bank kreditlərinin faizinin dayandırılmasını təklif edib.
Rusiyalı ekspert dünya iqtisadiyyatının koronavirusdan sonra nə vaxt bərpa olunacağını açıqladı – MÜSAHİBƏ
