Koronavirusun yeni növünün yayılması qlobal iqtisadiyyatın bir sıra sahələrinə, o cümlədən də turizm sektoruna ciddi zərbələr vurmaqdadır.
Bu bölgə turizminə də öz təsirlərini göstərməkdədir. Azərbaycanlı turistlərin ən çox üz tutduğu Gürcüstanda koronavirus təhlükəsi ilə əlaqədar olaraq ölkə ərazisinə daxil olma şərtlərini sərtləşdirilib. Gürcüstanın Dövlət Qurumlararası Koordinasiya Şurasının iclasında qəbul olunan qərara əsasən, Gürcüstana gedən və son 14 gün ərzində epidemiya riskinin olduğu ölkələrdə səfərdə olan yerli və xarici ölkə vətəndaşları ölkəyə daxil olarkən koronavirus tetsindən keçmələri barədə sertifikat təqdim etməli olacaqlar.
Əcnəbilər bu sənədi gəldiyi ölkənin və ya tranzit ölkənin müvafiq laboratoriyasından əldə etməlidir. Gürcüstana daxil olan şəxslər sərhəd-keçid məntəqələrində intensiv tibbi yoxlanışdan keçiriləcək və məcburi qaydada 14 günlük karantində saxlanılacaqlar.
Bu qərarın region turizminə təsirləri necə olacaq?
Dövlət Miqrasiya Xidməti Yanında İctimai Şuranın sədri Azər Allahverənov “Cümhuriyət” qəzetinə açıqlamasında bildirib ki, bu cür qadağa Rusiyada da tətbiq olunur:
“Bu daha çox Rusiyanın Sibir əyalətlərinə aiddir. Miqrantlardan tələb olunur ki, onlar analiz versinlər və koronavirusun daşıyıcısı olub-olmamaları barədə tibbi arayış təqdim etsinlər. Bu yalnız virus riski yüksək olan ölkələrə gedən turistlərə deyil, bütün əmək miqrantlarına da şamil edilir. Gürcüstanda da belə bir arayışın tələb olunması başadüşüləndir. Həmin şəxslərin karantinə alınması mümkün riskləri azaldan haldır. Amma istənilən halda bu cür tədbirlərin həyata keçirilməsi turizmə mənfi təsir edir. Bu həm daxili turizmə, həm də turizm mübadiləsinə təsir edəcək. Bu yalnız risk faktoru yüksək olan ölkələrdən gələnlərə deyil, digər ölkə vətəndaşlarına da aiddir”.
Ekspert bildirir ki, virus iqtisadiyyatın ən çox təsir etdiyi sahələrdən biri də turizm sektorudur:
“Yaxın bir neçə aydan sonrakı göstəricilər Gürcüstanın bundan aldığı zərərin həcminin nə qədər olacağını göstərəcək. Son illərin statistikasına baxdıqda görürük ki, Gürcüstanda turizm axını yüksək idi – 7-8 milyon nəfərə qədər turist səfərləri baş verirdi, artıq ölkədə 10 milyondan artıq turist qəbul etməklə bağlı strategiyanı açıqlamışdılar. İndi koronavirusla bağlı olan durum ölkənin turizm sektoruna böyük zərbə vurmuş olacaq”.
Azər Allhverənov deyir ki, Gürcüstanda qaydaların sərtləşdirilməsi Azərbaycana təsirsiz ötüşməyəcək:
“Bu səfər turizminə mənfi təsirini göstərəcək. Çünki azərbaycanlıların xaricdə istirahət etməyə üstünlük verən böyük hissəsi Gürcüstana üz tuturdu. Amma hazırda artıq bu ölkəyə səfər etmək istəyən vətəndaşlarımızın sayında azalma müşahidə olunur. Ayrı-ayrı aidiyyatı qurumlarda keçirdiyimiz görüşlər zamanı məlum olur ki, Gürcüstan istiqamətində satılan turpaketlər üçün müraciət edən insanların sayında azalma müşahidə olunur”.

Azərbaycanda koronavirus xəstəliyinin yayılmasının qarşısının alınması üzrə profilaktik tədbirlər davam etdirilir. Bütün sahələrdə olduğu kimi, turizm sektorunda da qabaqlayıcı tədbirlər görülür. Ölkəmizin dilbər guşələrindən biri də turistlərin ən çox üz tutduğu Lənkərandır.

Rayonda yerləşən istirahət kompleksinin icraçı direktoru Kazım Kazımov AZƏRTAC-a bildirib ki, müştərilərin sağlamlığının təminatı üçün səhər və gecə saatlarında profilaktik tədbirlər icra olunur: “İşçi heyətimizin hər bir üzvü işə başlamazdan əvvəl həkim müayinəsindən keçirilir. Xidmət zamanı da tez-tez gigiyenik qaydalara riayət edilir. Bölgəmizdə koronavirus təhlükəsi yoxdur. Hər bir turist həmişəki kimi gəlib səfalı məkanlarımızda istirahət edə bilər”.

Kompleksin insan resursları departamentinin müdiri Elnur Əliyev isə qeyd edib ki, hər bir insan öz şəxsi gigiyenasına fikir verməlidir: “Restoranımızda aparılan bu dezinfeksiya tədbirləri müştərilərimizin sağlamlığının qorunmasına yönəlib. Çalışırıq ki, turistlər restoranımızda olarkən hər hansı problemlə qarşılaşmasınlar. Bir sözlə, bu işlər müştərilərimizin sağlamlığı üçündür”.

Lənkəranda yerləşən 17 mehmanxana və otel tipli obyektlərin hər birində gündəlik dezinfeksiya tədbirləri görülür, işçilər arasında maarifləndirmə aparılır.

“Dövlət Turizm Agentliyi hər bir ssenariyə hazırdır. Ölkədə Novruz bayramına hazırlıqlar davam edir. Novruzla əlaqədar şənliklərin və tədbirlərin keçirilməsi hamısı qüvvədədir. Hadisələr regionumuzda və dünyada hər gün dəyişir və bu, nəzərə alınmalıdır”.

APA-nın məlumatına görə, bunu Dövlət Turizm Agentliyinin mətbuat katibi Kənan Quluzadə bildirib.

O qeyd edib ki, ötən il Azərbaycan turizmi mənfi tendensiya ilə başlamışdı, bu il isə müsbət tendensiya müşahidə olunur: “İndi koronavirusa görə bu dövrləri müqayisə etmək hələ tezdir. Koronavirus Azərbaycanın sərhədlərinə təzə gəlib. Yanvarda koronavirus Çində olsa da, bu qədər qlobal səviyyədə deyildi. Yanvarda Azərbaycana gələn turistlərin sayında 18 faiz artım var idi. Fevralda da rəqəmlər müsbət olacaq”.

K. Quluzadə deyib ki, İtaliya, Avropanın digər ölkələri, İranda, Gürcüstanda xəstəlik aşkarlanıb: ”Ətraf ölkələrdə ciddi problemlər var. Martın birinci yarısının sonunda tendensiyanın nədən ibarət olacağı, rəqəmlərin necə dəyişəcəyi bilinəcək. Biz ümid edirik ki, illik rəqəmlərimiz mənfi olmayacaq. Bu, hadisələrin gedişatından asılıdır”.