Nefti ilə Azərbaycanı dünyaya tanıdan, yaxın zamanlara qədər isə baxımsız vəziyyətdə olan Balaxanıdan yolunuz düşsə, bəlkə də, gözlərinizə inanmayacaqsınız. 

Gezmeli.az Baku TV-ə istinadən xəbər verir ki, qəsəbə küçələrində həyata keçirilən təmir işlərindən sonra Səfəvilər, Sabir və Dirçəliş küçələri dünyanın məşhur turizm ərazilərinə bənzədilib. 

Tarixi qəsəbəyə rəng qatmaq üçün qapı pəncərələr al-əlvan rənglərə boyanır, dalanlara qənbər daşlar döşənir. Yolların səkiləri bərpa olunur, əsrlik yaşı olan binaların fasadları yenilənir. Balaxanı qəsəbəsinin yeni turizm marşrutu kimi müəyyənləşdiriləcək. Turizm məkanına çevrilməsi üçün Kiçik və Orta Biznesin İnkişafı Agentliyi, Dövlət Turizm Agentliyi və “Bakı Abadlıq Xidməti” birgə əməkdaşlıq edəcək.

Burada turizm yönümlü sahibkarlığın, xüsusilə sənətkarlıq üzrə xalçaçılıq, dulusçuluq, milli geyimlərin hazırlanması, xidmət sektorunda kiçik iaşə obyektlərinin, hostellərin yaradılması, müxtəlif suvenir, keramik qablar, xalça, musiqi alətləri, şirniyyat satışı sahələri üzrə 100-ə yaxın kiçik obyektin fəaliyyəti təşkil olunacaq.

Gürcüstanın turizmdən əldə etdiyi gəlirin 80 faizi qonşu ölkələrin payına düşür. Ötən il Gürcüstan Azərbaycan, Ermənistan, Rusiya və Türkiyədən milyondan çox turist qəbul edib. Lakin, Gürcüstan epidemioloji vəziyyətini heç nəyə qurban verə bilməz.

Gezmeli.az Azərtaca istinadən xəbər verir ki, bu sözləri Gürcüstanın Maliyyə naziri İvane Maçavariani ölkənin “İmedi” televiziya kanalına müsahibəsində söyləyib.

Onun sözlərinə görə, risk və potensial gəlirlər, faydalar balanslaşdırılmalıdır. Əks halda, Gürcüstan risklə üz-üzə qala bilər.

“Gürcüstanın ənənəvi turizm bazarlarında pandemiyaya qalib gəlinərsə və nisbətən təhlükəsiz templərə nail olunarsa, yalnız bu halda həmin ölkələrlə sərhədlər açıla bilər”, – deyə Mçavariani vurğulayıb.

Nazir deyib ki, beynəlxalq turizmlə bağlı koronavirusun idxalı minimal həddə olmalıdır.

Azərbaycan Turizm Agentlikləri Assosiasiyası (ATAA) mövcud vəziyyəti nəzərə alaraq turizm şirkətlərinin koronavirus pandemiyası (COVID-19) dövründə fəaliyyətini tənzimləyəcək metodiki göstərişlərdən ibarət xidmət prosedurunu hazırlayıb.

Qurumun mətbuat xidmətindən bildirilib ki, tövsiyə xarakterli təlimata əsasən, turizm şirkətləri ofislərin giriş qapısında qaydaları əks etdirən məlumat lövhəsi yerləşdirməli, məkana daxil olan vətəndaşlar sanitayzer, qoruyucu maska və tibbi əlcəklərlə təmin edilməli, termometrlə vətəndaşların bədən hərarəti ölçülməlidir. Həmçinin ofis daxilində sosial məsafənin saxlanılmasını əks etdirən işarələr yerləşdirilməlidir. İşçi personalı və vətəndaş arasında sosial məsafə qorunmalı, müştərilərə xidmətin göstərilməsi qoruyucu şüşə arakəsmələr arxasından edilməlidir. Eləcə də şirkət tərəfindən personalın qoruyucu maskalarda və əlcəklərdə olması təmin olunmalıdır.

Bunla yanaşı, turizm agentliyi tərəfindən göstərilən xidmətlərin müqabilində edilən ödənişlərin yalnız POS terminal vasitəsilə həyata keçirilməsi tövsiyə olunur.

Yeni qaydalarla bağlı maarifləndirmə işinin davamı olaraq Azərbaycan Turizm Agentlikləri Assosiasiyası məlumatlandırıcı videoçarx da hazırlayıb. Yaxın günlərdə turizm şirkətlərinə göndəriləcək.

Azərbaycan Turizm Agentlikləri Assosiasiyası mövcud vəziyyətdən irəli gələrək vətəndaşların və işçi personalının sağlamlığının qorunması əsas məsələdir. Turizm şirkətlərinin pandemiya dövründə yeni qaydalara riayət etməklə fəaliyyət göstərmələrini tövsiyə edirik.

İyulun 8-də Alman-Azərbaycan Xarici Ticarət Palatasının təşkilatçılığı ilə “Pandemiya dövründə Azərbaycanın turizm sənayesi” mövzusunda vebinar keçirilib. Keçirilmiş vebinarda Azərbaycan Turizm Bürosunun Baş icraçı direktoru Florian Zenqstşmid çıxış edib.

Dövlət Turizm Agentliyindən bildirilib ki, “Çağırışlar və Azərbaycan turizminin gələcək perspektivləri” mövzusunda çıxış edən F.Zenqstşmid Azərbaycanın turizm sənayesinin pandemiya dövründə vəziyyəti, ölkədə turizmin 4 mərhələli bərpa planı, sənaye nümayəndələrinə verilən dəstək mexanizmləri, mövcud çarter reysləri və sərnişin daşımaları ilə bağlı tətbiq olunan qaydalar, həmçinin “SAHMAN” proqramı və “Macəra Yaxındadır” daxili turizm kampaniyası kimi təşəbbüslər barəsində məlumat verib.

Vebinarda, həmçinin Alman-Azərbaycan Xarici Ticarət Palatasının icraçı direktoru Tovias Bauman, idarə heyətinin sədri Fərid İsayev, “Hyatt Regency Baku” hotelinin baş meneceri Uolter Qaq və “Deutsche Lufthansa AG” şirkətinin satış üzrə baş meneceri Rene Koinzak iştirak edərək, sualları cavablandırıblar.

Qeyd edək ki, Alman-Azərbaycan Xarici Ticarət Palatası (AHK Azərbaycan) Almaniyanın iqtisadi sahədə Azərbaycandakı rəsmi nümayəndəliyi kimi 2012-ci ildən fəaliyyət göstərir. Müasir konsaltinq şirkəti rolunu oynayan təşkilat 140-dan artıq üzvünə bazar və biznes araşdırmaları ilə bağlı məlumat verərək dəstək göstərir.

Dünyada pandemiyadan ən çox ziyan çəkən sahələrdən biri də turizm sahəsidir.

Gezmeli.az Trend-ə istinadən xəbər verir ki, Dövlət Turizm Agentliyinin şöbə müdiri Kənan Quluzadə “PREZİDENT. Müstəqillik. Təhlükəsizlik. Rifah” adlı video layihəsinə açıqlamasında bildirib ki, pandemiya dövründə turizm sahəsinin dəstəyə ehtiyacı var və Azərbaycanda ölkə rəhbərliyi bununla bağlı artıq göstərişlər verib:

“Struktur baxımından götürsək Azərbaycan turizminin bərpa edlilməsi karantin bitdikdən sonra mümkündür. Karantin rejiminin bitdiyi günün səhərisi Azərbaycan turizmi bərpa oluna bilər, yəni yeni turzm mövsümü açıla bilər”.

Onun sözlərinə görə, əslində, turizm sahəsi bundan öncədə bu tipli olmasa da, böhran dövrlərini yaşayıb. Amma hər dəfə özünü bərpa etməyi bacaran sahədir. Cənab Prezidentin də vurğuladığı kimi indiki məqamda turizmə dəstək olmaq lazımdır ki, bu sahə özünü bərpa edib, inkişaf etsin:

“Biz mütəmadi olaraq Azərbaycanda turizmə olan diqqət və qayğı barəsində Dünya Turizm Təşkilatına məlumatlar veririk. Dünya Turizm Təşkilatında çox yaxşı bilirlər ki, Azərbaycanda ölkə rəhbərliyi səviyəsində tuzim sahəsinə diqqət və qayğı var. Xüsusilə də Prezident İlham Əliyev və Mehriban Əliyeva tərəfindən turizmə olan yüksək diqqət Dünya Turizm Təşkilatı tərəfindən yüksək qiymətləndirilir”.

Azərbaycan Turizm Bürosu Azərbaycan haqqında məlumatlılığın saxlanılması və genişləndirilməsi fəaliyyətini onlayn vebinarlar və görüşlər vasitəsilə davam etdirir. Fəaliyyət çərçivəsində iyun ayı ərzində xarici bazarlardakı turizm tərəfdaşları ilə 54 onlayn görüş və 17 vebinar təşkil olunub.

Dövlət Turizm Agentliyindən Gezmeli.az bildirilib ki, onlayn görüşlərdə Yaxın Şərq ölkələri, Hindistan, Çin, Rusiya, Belarus, Qazaxıstan, Polşa, Almaniya, Böyük Britaniya, İtaliya, Hollandiya və Norveçdən olan turoperatorlar və turizm şirkətləri də qoşulub. Postpandemiya dövründə dünya turizminin yeni inkişaf trendlərindən danışılıb. Turizm sənayesindəki dəyişikliklər mövzusunda müzakirələr aparılıb.

Hədəf bazarlardan olan turizm şirkətlərinin nümayəndələri ilə keçirilən vebinarlara isə 470-dən çox iştirakçı qatılıb.

Azərbaycan haqqında “E-öyrənmə” onlayn təlim platforması (elearning.tourismboard.az) vasitəsilə Avropa, Yaxın Şərq ölkələri, MDB ölkələri, Yaxın Şərq, Cənubi Asiya kimi regionlardan olan 40-dan çox ölkədən 312 nəfər Azərbaycan haqqında ümumi məlumat, Azərbaycan təbiəti, Azərbaycan toy destinasiyası kimi, şərab turları, alman irsi, yəhudi irsi, müalicəvi turizm məhsulları, qastronomiya, həmçinin regionların turizm imkanları kimi bir neçə moduldan ibarət olan təlimlərdə iştirak edərək “Azərbaycan turizmi üzrə ekspert” statusunu qazanıb.

Azərbaycan Turizm Bürosu tərəfindən peşəkar dizaynerlər və “Azərbaycan: Bir daha bax” konsepsiyası barədə daha geniş məlumat axtarışında olanlar üçün Azərbaycan Brend Mərkəzi platforması yaradılıb.

Dövlət Turizm Agentliyindən bildirilib ki, Azərbaycan və ingilis dillərində fəaliyyət göstərən platformada istifadəçilərə brendin tarixçəsi barədə məlumat verilir. Bununla yanaşı, bu brendə daxil olan elementlərin müxtəlif formaları ilə tanış olmaq, məlumatları müxtəlif vizuallıqlarda əldə etmək imkanı təqdim olunur.

Platforma istifadəçiləri Azərbaycanın turizm loqosunun fərqli versiyalarını hazırlamaq üçün texniki biliklərlə təmin edir. Həmçinin mövcud brend elementlərini də yükləmək mümkündür.

Bundan başqa, veb-sayta mütəmadi olaraq yenilənəcək foto və video baza da daxildir.

Veb-saytın imkanlarından istifadə etmək üçün https://azerbaijanbrandcenter.com/user/login keçidinə daxil olaraq onlayn qeydiyyatdan keçmək tələb olunur.

Azərbaycan Turizm Bürosunun Baş icraçı direktoru Florian Zenqstşmid Azərbaycan Brend Mərkəzinin yaradılmasına münasibətini bildirib. O bu addımı dizaynerlərin bacarıqlarının inkişaf etdirilməsi baxımından uğurlu addım kimi qiymətləndirib. O qeyd edib ki, “Azərbaycan: Bir daha bax” brendi ideyasının uğur qazanmasının səbəblərindən biri onu dəstəkləyən vizual vasitələrin uğurlu seçimi olub.

Xatırladaq ki, “Azərbaycan: Bir daha bax” qlobal marketinq kampaniyası bundan öncədə keçirilib. İlk dəfə 2018-ci ilin noyabr ayında Londonda keçirilən “World Travel Market” sərgisində dünya ictimaiyyətinə təqdim edilib. Azərbaycanın yeni turizm brendi bu günədək 15 ölkədə keçirilmiş 30-a yaxın beynəlxalq sərgi və təqdimatlarda ölkənin turizm imkanlarının yeni tərzdə çatdırılmasında önəmli rol oynayıb. 20-dən çox beynəlxalq mükafata layiq görülüb.