Naftalanda Yeni Avtovağzal Otel Kompleksi istifadəyə veriləcək
Manatın məzənnəsi üçün 700 milyon dollarlıq əməliyyat
Ötən il Manatın bahalşamasının qarşısının alınması üçün bazardan 700 milyon dollardan artıq vəsait alınıb.
“Marja” xəbər verir ki, Yanvarın 13-də Azərbaycan Prezidenti İlham Əliyevin yanında 2019-cu ilin yekunlarına həsr olunmuş müşavirə edib. Mərkəzi Bankın sədri Elman Rüstəmov çıxış edərək bildirib:
“Neftin qiymətinin keçən il həm “Azəri Layt”, həm “Brent” üzrə bir qədər aşağı düşməsinə baxmayaraq, 6 milyardlıq xarici ticarət profisiti və bütövlükdə xarici valyuta mənbələrinin bazara şaxələnməsi şəraitində, həm turizmdən, həm qeyri-neft sektorundan və digər sahələrdən təklifin olduğu bir şəraitdə manatın məzənnəsi sabit qalmışdır. Bütövlükdə isə təxminən bazardan Maliyyə Nazirliyi, xəzinədarlıq və Mərkəzi Bank 700 milyon dollardan yuxarı vəsaiti sterilizasiya etmək məcburiyyətində qaldı ki, manatın möhkəmlənməsinə təsir göstərməsin”.
Müşavirədə Prezident İlham Əliyev deyib: Manatın məzənnəsi 3 ildən çoxdur ki, sabitdir. Iqtisadiyyat möhkəmlənir, tədiyə balansının saldosu 6 milyard dollardır. Yəni, heç bir təhlükə yoxdur.
Məlumat üçün bildirək ki, sterilizasiya əməliyyatı artmış pul kütləsinin inflyasiya potensialına malik izafi hissəsinin dövriyyədən çıxarılmasına yönəldilmiş bir əməliyyatdır.
Bu şəhərdə suvenir satışı qadağan edildi
Romada məşhur tarixi turist yerlərinin yaxınlığında suvenir, içki və fastfud satışı qadağan edilib.
“İnterfaks”ın məlumatına görə, bu, “overturizm”lə mübarizə məqsədilə atılan addımdır.
Roma rəhbərliyi kütləvi turizmlə mübarizə aparmaq məqsədilə radikal addım atıb. İndi İspan pilləkəni, Panteon, Trevi fəvvarəsi kimi məşhur yerlərin ətrafında suvenir, içki və fastfud ticarəti mümkün olmayacaq.
Qeyd edək ki, ən məşhur yerli suvenirlər arasında Roma papasının fiquru, Kolizey, qladiator dəbilqəsi kimi heykəlciklər və maqnitlər yer alıb. Orta hesabla Romada suvenirlərin qiyməti digər Avropa şəhərlərindən daha ucuzdur və turistlərin diqqətini daha çox çəkir.
Suvenir satışı ilə məşğul olan şəxslərə alternativ yerlər təklif olunub. Lakin onların çoxu bu qərarla razı deyil.
Roma çoxdandır aşırı turist əlindən əziyyət çəkən şəhərlər arasındadır. Buna görə, şəhər rəhbərliyi tez-tez turistlərlə bağlı oxşar qərarlar qəbul etməli olur.
Ukraynalı politoloq: Qərb Ermənistana qarşı sanksiyalar tətbiq edə bilər
Bəzi erməni kütləvi informasiya vasitələrində Krımdan Ermənistana ilk “beynəlxalq uçuş”un başlanması barədə məlumat yayılıb.
Bildirilib ki, ilhaq edilmiş yarımadanın turizm, kurortlar və idman komitəsinin sədri Aleksey Çernyak Rusiya Federal Hava Nəqliyyatı Agentliyinin (“Rosaviasiya”) 2020-ci ildə Simferopol (Krım) və Yerevan (Ermənistan) hava limanları arasında aviaəlaqənin açılmasını razılaşdırdığını bildirib.
“Cari ilin mart ayından Krım və Ermənistan arasında müntəzəm aviareyslərin başlanması planlaşdırılır. “İkar” aviaşirkəti artıq müntəzəm uçuşlar üçün “Rosaviasiya”dan müvafiq icazə və təsdiq alıb. İndi məsələ, o cümlədən, uçuş cədvəlləri və hava limanları ilə razılaşmalar baxımından hazırlıq və razılaşdırma mərhələsindədir.
Uçuşlar mart ayından həftədə iki dəfə planlaşdırılır. Daha sonra isə tələbatdan asılı olacaq, lakin həftədə yeddi dəfədən artıq olmayacaq”, – Çernyak bildirib.
Qeyd etmək lazımdır ki, Simferopol-Yerevan reysinin başlanmasına dair informasiyanın rəsmi təsdiqi yoxdur.
Ukraynalı diplomat və politoloq Vadim Tryuxan bildirib ki, Rusiya üçün Krım hava limanları və Sevastopoldan müntəzəm birbaşa beynəlxalq aviaəlaqələrin təşkil olunması – prinsip məsələsidir:
“Ənənəvi olaraq Rusiyaya yönələn Ermənistan çətin ki, belə bir təhlükəli presedentin yaradılmasına getsin. Düşünürəm ki, ukraynalı diplomatlar Ermənistan rəhbərliyinə belə bir hipotetik qərarın faydalarının onun mümkün nəticələrilə nisbətdə müqayisəolunmaz şəkildə az olacağını izah edə biləcəklər.
Bu yaxınlarda Ukraynanın İrəvandakı səfirliyinə təcrübəli ukraynalı diplomat – İvan Kuleba rəhbərlik edib.
“Ukraynada gözəl bilirlər ki, Rusiya öz maraqları naminə bu yarımasılı ölkədən istifadə etməyə çalışacaq. Buna görə də bu və buna bənzər vəziyyətlərdə Ukrayna qabaqlayıcı tədbirlər görəcək”, – o bildirib.
Politoloq qeyd edib ki, Simferopol və Yerevan arasında birbaşa aviaəlaqələr ilk dəfə hələ 2014-cü ilin oktyabrında anons edilib. Lakin hər şey əvvəlki kimidir.
Öz növbəsində ukraynalı siyasi ekspert Petro Oleşçuk Oxu.Az-a bildirib ki, Krımdan Ermənistana aviareysin açılması informasiya tullantısından başqa bir şey deyil:
“Aydındır ki, bu növbəti informasiya tullantısıdır. Yerevan-Krım aviareysinin açılması barədə şayiələr artıq 2019-cu ilin dekabrında aktiv şəkildə tirajlanırdı. Ancaq nəticədə, Ermənistanın Baş nazirinin Aparatının İctimaiyyətlə Əlaqələr və İnformasiya Mərkəzi məlumatların həqiqəti əks etdirmədiyini bildirdi.
Öz növbəsində Ermənistan Mülki Aviasiya Komitəsindən bildirilib ki, göstərilən Rusiya şirkəti ilə belə müzakirələr aparılmayıb, Krım istiqamətinin açılması üçün müraciətlər daxil olmayıb.
Ekspert onu da qeyd edib ki, Ermənistan aviaəlaqəni yaratmaq qərarına gəlsə, bu zaman Qərb Ermənistana qarşı sanksiyalar tətbiq edə bilər.
Ukraynalı politoloq hər şeyə baxmayaraq Ermənistanın Krımla aviaəlaqə yaratmaq qərarının qəbul edilməsi ilə bağlı özünə hesabat verəcəyinə ümid etdiyini, əks halda rəsmi Yerevanın mümkün fəsadlarla qarşılaşa biləcəyini bildirib.
“Ancaq hazırda əminliklə deyə bilərəm ki, bu, “saxtadır”, – ekspert fikrini tamamlayıb.
“Tütək səsi” filminin çəkildiyi Şahdağın ətəyindəki Xuray kəndindən
Üstündən 45 il ötsə də, Qusarın Xuray kəndinin sakinləri “Tütək səsi” filminin çəkilişlərini indiki kimi xatırlayırlar.
AZƏRTAC-ın bölgə müxbiri xəbər verir ki, milli kino incilərimizdən sayılan bu filmin əsas səhnələrinin çəkildiyi Xuray kəndi rayon mərkəzindən 16 kilometr məsafədə, Şahdağın ətəyində, Qusarçayın sahilində yerləşir. “Şahdağ” Turizm Mərkəzinə yolu düşənlər füsunkar təbiətə malik bu qədim kəndin yanından ötüb keçir.
Kütləvi səhnələrdə 500 nəfərə yaxın kənd sakini iştirak edib
1975-ci ildə lentə alınan “Tütək səsi” filminin səhnələri Xurayla yanaşı Əniğ, Urva və digər ətraf kəndlərdə də çəkilib. Kütləvi səhnələrdə bu kəndlərin 500 nəfərə yaxın sakini iştirak edib.
Xuray kəndində filmin çəkilişləri aparılan evlərin bəziləri, XVIII əsrə aid məscid binası (həmin vaxt klub kimi fəaliyyət göstərib), Qusarçay üzərindəki asma körpü bu günədək qalmaqdadır.
Filmin ssenarisi mərhum yazıçı İsa Hüseynovun “Tütək səsi” və “Saz” povestləri əsasında yazılıb. Hadisələr İkinci Dünya müharibəsi illərində Azərbaycan kəndlərinin birində gərgin zəhmət, ümumxalq birliyi, eyni zamanda, mürəkkəb insan münasibətləri mühitində cərəyan edir. Bu kənddə hər bir evdə müharibənin nəfəsi hiss olunur. Qadınlar və uşaqlar cəbhəyə getmiş ərlərin, ataların, oğulların yerinə çöl işləri görürlər. Müharibə fonunda cərəyan edən hadisələr dövrün ağrı-acısını əks etdirir.
Filmin ssenari müəllifi İsa Hüseynov, quruluşçu rejissoru Rasim Ocaqov, quruluşçu operatoru Teyyub Axundov, quruluşçu rəssamı Elbəy Rzaquliyev, bəstəkarı isə Aqşin Əlizadə olub. Baş rollarda Akif Məhərrəmov, Ötkəm İsgəndərov, Mixail Volontir, Yusif Vəliyev, Məmmədrza Şeyxzamanov, Sadıq Hüseynov, Səfurə İbrahimova və başqaları çəkilib.
Məmmədrza Şeyxzamanovu xatırladan asma körpü
Hazırda Xuray kəndinin Mədəniyyət evinin direktoru vəzifəsində çalışan Yüzbəy İsmayılov həmin vaxt 10 yaşında olub. Y. İsmayılov çəkiliş prosesini həvəslə izlədiyini, “Tütək səsi” filminə baxarkən yenidən həmin günləri xatırladığını bildirir. “Yaxşı yadımdadır, filmin çəkilişləri yay aylarında aparılırdı. Kəndimizin kənarındakı düşərgədə avtobuslar, kino avadanlıqlarını daşıyan avtomobillər dayanmışdı. Filmdəki Milli obrazında oynayan qızın “qara məktub”ları İsfəndiyar babadan gizlətdiyi səhnə bizim evdə çəkilib. İsfəndiyar kişinin saz çaldığı səhnə isə qonşumuzun həyətində lentə alınıb. Evlər yerində qalsa da, indi təmir olunub və müasir görkəmə salınıb. O vaxt kəndimizdə cəmi 120 ev olub. İndi isə evlərin sayı 3-4 dəfə çoxalıb. Çubuqdan, ağaclardan olan hasarların əksəriyyəti indi mişar daşı ilə hörülüb. O filmə baxanda həmişə kəndimizin 45 il əvvəlki görkəmini xatırlayırıq. Bəzi səhnələrdə kənd sakinlərimiz də düşüb. Onların çoxu artıq dünyasını dəyişib”, – deyə Yüzbəy İsmayılov söyləyib.
Filmdə İsfəndiyar kişinin qaçaraq üzərindən keçdiyi Qusarçay üzərindəki asma körpü artıq istifadə olunmur. İndi sakinlər 2007-ci ildə salınan yeni körpüdən istifadə edirlər. Köhnə asma körpü isə “Tütək səsi” filminin xatirəsi kimi qalmaqdadır.
Xuray sakinlərinin Cəbrayıldan niyə xoşu gəlmirdi?
Cümrünün damın başında tütək çalması səhnəsi çəkilən ev isə artıq sökülüb. Çəkiliş apardığımız zaman həmin evin yerində uşaqlar qartopu oynayırdı. Kənd sakinləri deyirlər ki, həmin ev yerində olmasa da, 45 il əvvəl səslənən tütəyin səsi indi də qulağımızdadır.
Doxsan yaşlı Xuray kənd sakini Mütəllim Mütəllimov bildirir ki, çəkilişləri izləyən yerli əhali Cəbrayıla (rolda aktyor Mixail Volontir çəkilib) bərk əsəbləşmişdi. Onlar həmin aktyorun doğrudan da əsgər ailəsinə sataşdığını düşünürdü. “Mən filmin çəkilişlərində şəxsən iştirak etmişəm. Əvvəlcə filmin rejissoru Rasim Ocaqov və bir neçə nəfər kəndimizə gəldi. Evlərə, məhəllələrə baxdılar. Bir ay sonra eşitdik ki, kəndə film çəkənlər gəlib. Mən onların düşərgəsində gözətçilik edirdim. Aktyorlar çəkilişdən sonra rayon mərkəzindəki mehmanxanaya gedirdi. Rayon mərkəzindən yemək üçün ərzaqların gətirilməsi də mənə həvalə olunmuşdu. Filmdə bir kadrda araba sürdüyüm yerdə məni də çəkiblər. Kütləvi səhnələrdə çəkilən kənd sakinlərinə gündəlik pul ödənilirdi. Qol çəkib pulu götürürdük. Çox maraqlı idi. Məmmədrza Şeyxzamanov, Yusif Vəliyev və başqa tanınmış aktyorlarla ünsiyyətdə olurduq”, – deyə Mütəllim Mütəllimov o günləri xatırlayır.
Qılınc Qurban, Cəbrayıl və İsfəndiyar kişinin əyləşdiyi həmin səhnə
Kinoda iclasların keçirildiyi səhnələr həmin vaxt klub kimi fəaliyyət göstərən kənd məscidinə bitişik tikilidə çəkilib. Filmin lentə alındığı zaman XVIII əsrə aid məscid anbar kimi istifadə olunurdu. Sonralar klubu sökülsə də, məscidə bitişik səhnə hissəsi bu günədək qalmaqdadır. Filmin həmin səhnədə çəkilən epizodunda Qılınc Qurban, Cəbrayıl və İsfəndiyar kişi tarladan toplanan taxılın cəbhə üçün göndərilməsini camaatla müzakirə edirdi. Bundan başqa, filmdə cəbhəyə yardım toplanması ilə bağlı daha bir səhnə də həmin yerdə çəkilib.
Film çəkilişlərini izləyən kənd sakini Mirzəbəy Eyvazov da həmin günlərdən döyük həvəslə danışır. “Bütün kənd filmin çəkilişinə səfərbər olmuşdu. Hamı kömək etməyə çalışırdı. Bizim kəndlə qonşu Əniğdə də çəkilişlər aparılırdı. Yadımdadır, öküzlərlə taxıl biçini səhnəsi isə Urva kəndində çəkildi. Biz çox şadıq ki, Xuray “Tütək səsi” filminin çəkildiyi kənd kimi tanınır. Qonaqlarımıza bu barədə fəxrlə danışırıq”, – deyə M.Eyvazov bildirib.
“Tütək səsi” filmi televiziya tamaşaçılarına 1976-cı ildə təqdim olunub və böyük maraqla qarşılanıb. Elə həmin ildə Qırğızıstanın paytaxtı Bişkek şəhərində keçirilən IX Ümumittifaq kinofestivalında ən yaxşı film kimi mükafat alıb.
Natia Turnava: Regionda sülhün bərqərar olması Gürcüstan üçün mühüm əhəmiyyət kəsb edir
Biz regionda baş verən hadisələri, xüsusən də ABŞ ilə İran arasındakı son vəziyyəti analiz edir, Gürcüstan üçün mümkün təhlükələri nəzərdən keçiririk. Regionda sülhün bərqərar olması Gürcüstan üçün mühüm əhəmiyyət kəsb edir.
AZƏRTAC xəbər verir ki, bu sözləri Gürcüstanın İqtisadiyyat və Davamlı İnkişaf naziri Natia Turnava söyləyib.
Nazirin sözlərinə görə, regionda baş verən hadisələr həm təhlükəsizliyə, həm də iqtisadi inkişafa ciddi təhdiddir. Gürcüstan hökuməti bütün prosesləri diqqətlə izləyir və ümid edir ki, beynəlxalq birlik ABŞ ilə İran arasındakı gərginliyin sülh yolu ilə həlli üçün çıxış yolu tapacaqdır.
“ABŞ ilə İran arasındakı münaqişə hələlik Gürcüstan iqtisadiyyatına elə də güclü təsir göstərməyib”, – deyə N.Turnava vurğulayıb.
Qeyd edək ki, Gürcüstanın İran və İraq ilə ticarət əlaqələri var və bu ölkələrdən Tbilisiyə hər il yüzlərlə turist gəlir.
Məlumat üçün bildirək ki, Gürcüstan ilə İran arasında diplomatik münasibətlər 1992-ci il mayın 15-də qurulub.
Həmin ildən iki ölkə arasında, siyasi, iqtisadi, ticari, kənd təsərrüfatı, mədəniyyət, qarşılıqlı sərmayə qoyuluşu, turizm, təhsil sahələrində əlaqələr inkişaf edir.
Gürcüstan Milli Statistika Xidmətinin məlumatına görə, 2018-ci ildə Gürcüstan ilə İran arasında ticarət dövriyyəsi 38,7 faiz artaraq 251,9 milyon dollar təşkil edib.
Milli Turizm Administrasiyasının məlumatına görə, 2018-ci ildə İrandan Gürcüstana 291 min 100 nəfər, 2019-cu ilin 11 ayında isə 132 min 800 turist gəlib.
Gürcüstan ilə İraq arasında diplomatik münasibətlər isə 2007-ci il sentyabrın 18-də yaranıb.
İki ölkə arasında da əlaqələr ikitərəfli və çoxtərəfli müstəvidə inkişaf edir.
2018-ci ildə İraqdan Gürcüstana 2100 nəfər, 2019-cu ilin 11 ayında isə 1600 nəfər turist gəlib.
Ötən il Naxçıvanda miqrasiya sahəsində qanunvericiliyin tələblərini pozan 202 əcnəbi aşkarlanıb
Bütün sahələrdə əldə olunmuş yüksək nailiyyətlər, sürətli sosial-iqtisadi inkişaf, yaradılan güclü infrastruktur sayəsində Naxçıvan Muxtar Respublikasında yaşamaq, işləmək, təhsil almaq, ölkəmizin vətəndaşı olmaq istəyənlərin sayı ilbəil artır.
Muxtar respublikanın Dövlət Miqrasiya Xidmətində 2019-cu ilin yekunları və qarşıda duran vəzifələrə dair keçirilən kollegiya iclası keçirilib. Bu sözləri xidmətin rəisi, III dərəcəli dövlət miqrasiya xidməti müşaviri Şahin Nəbiyev deyib.
Xidmət rəisi bildirib ki, muxtar respublikaya gələn əcnəbilərin və vətəndaşlığı olmayan şəxslərin qeydiyyatı, müvəqqəti və daimi yaşaması, iş icazələrinin verilməsi, ölkədə olma qaydalarının tənzimlənməsi, qeyri-qanuni miqrasiya ilə mübarizə və miqrasiyanın mənfi təzahürlərinin qarşısının alınması Dövlət Miqrasiya Xidməti tərəfindən 2019-cu ildə də ciddi nəzarətdə saxlanılıb. Görülmüş tədbirlər nəticəsində əcnəbilər və vətəndaşlığı olmayan şəxslər tərəfindən Azərbaycan Respublikasının miqrasiya sahəsində qanunvericiliyinin tələblərini pozan 202 əcnəbi aşkarlanıb. Onlardan da 197-si barəsində Azərbaycan Respublikası İnzibati Xətalar Məcəlləsinin müvafiq maddələrinə uyğun olaraq ölkə hüdudlarından kənara inzibati qaydada çıxarılmamaqla cərimə inzibati tənbeh növü tətbiq edilib. 56 nəfər tətbiq edilmiş cəriməni ödəmədiyindən, cərimə ödənilənədək ölkə ərazisinə girişinə məhdudiyyət qoyulub.
“Əcnəbilərin olduğu yer üzrə qeydiyyatı, müvəqqəti olma müddətinin uzadılması, müvəqqəti və daimi yaşama icazələrinin verilməsi, iş icazələrinin verilməsi, vətəndaşlıq məsələləri və xidmətin səlahiyyətlərinə aid olan digər məsələlərlə bağlı, ümumilikdə, xidmətə 10613 müraciət daxil olub həmin müraciətlərdən 8624-ü əcnəbilərin və vətəndaşlığı olmayan şəxslərin Azərbaycan Respublikasında olduğu yer üzrə qeydiyyatı ilə bağlıdır”, – deyən Şahin Nəbiyev bildirib ki, aparılan uğurlu siyasət vaxtilə respublikanı tərk edib. Digər dövlətlərə getmiş Azərbaycan vətəndaşlarının da geri qayıtması tendensiyasına müsbət təsir edir. Cari il ərzində muxtar respublikada 2 nəfər Azərbaycan vətəndaşlığına qəbul olub. 1 nəfərin isə vətəndaşlığı bərpa edilib.
Maarifləndirmə mövzusuna xüsusi toxunularaq qeyd edilib. Xidmət tərəfindən mütəmadi olaraq bu istiqamətdə müxtəlif məzmunlu tədbirlər reallaşdırılır. Tədbirlərin yekununda onların muxtar respublikada fəaliyyət göstərən muzeylərə gedilir. Turizm məkanlarına ekskursiyaları da təşkil olunur.
Sonra məruzə ətrafında müzakirələr olub.
Kollegiya iclasında xidmətin 2020-ci il üçün iş planı təsdiq edilib.
“Schwäbisches Tagblatt” qəzetində Azərbaycandakı alman irsinə həsr olunmuş məqalə dərc edilib
Almaniyanın “Schwäbisches Tagblatt” qəzetində dərc edilən məqalədə 200 il öncə Roytlingen və Tübingendən olan alman ailələrinin Qafqaza köç etdikləri bildirilir.
Məqalədə 2019-cu ildə 25 nəfərlik qrupun, o cümlədən Roytlingen və Tübingendən olan ailələrin öz əcdadlarının vətənini ziyarət etmək məqsədilə Azərbaycana gəldikləri, onların əcdadlarının 1817-ci ildə Almaniyanın Vürtemberq əyalətindəki ağır vəziyyətlə əlaqədar buranı tərk etdikləri və ədalətli xristian icması yaratmaq məqsədilə Qafqaza təşrif gətirdikləri vurğulanır. Azərbaycana gələn alman ailələrinin iki ildən sonra burada Helenendorf adlı alman koloniyasının əsasını qoyduqları diqqətə çatdırılır. Kiçik Qafqazın ətəyində yerləşən Helenendorfun yerində hazırda Azərbaycanın Göygöl rayonunun olduğu, eyniadlı mərkəzi olan rayonda 20 min sakinin yaşadığı, onların böyük bir qismini Azərbaycanın Ermənistan tərəfindən işğal edilmiş Dağlıq Qarabağ bölgəsindən gələn məcburi köçkünlərin təşkil etdiyi bildirilir. Burada artıq almanların qalmadığı, onların hamısının Stalin tərəfindən 1941-ci ildə deportasiya olunduğu qeyd edilir.
Məqalədə almanlara məxsus arxitektura əsasında inşa edilmiş evlərdən söz açılır. Onların hündür damları və böyük şüşəbəndləri ilə diqqəti cəlb etdikləri nəzərə çatdırılır. Vurğulanır ki, bəzi evlərin girişindəki divar daşlarında hələ də alman adlarına rast gəlmək mümkündür. Məqalədə şəhərdə yerləşən, 1857-ci ildə almanlar tərəfindən yeni qotik üslubda inşa edilmiş yevangelik kilsədən bəhs olunur. Onun bir müddət öncə Almaniya Beynəlxalq Əməkdaşlıq Cəmiyyətinin dəstəyilə bərpa edildiyi xatırlanır. Azərbaycan hökumətinin ötən illər ərzində alman arxitektura nümunələrinin qorunub saxlanılması üçün böyük işlər gördüyü bildirilir.
Diqqətə çatdırılır ki, Azərbaycana səfər edən qrupdakı ən yaşlı insan 86 yaşlı xanım Marqarita Raytenbaxdır. Onun əcdadı Yohan Braytenmayer 1817-ci ildə Braytenholçdan köç edərək Azərbaycana gələnlər arasında olub. M.Raytenbax Helenendorfda dünyaya gəlib və səkkiz yaşınadək orada, 1990-cı ildən etibarən isə ailəsi ilə birlikdə Almaniyanın Osnabrük (Osnabrück) şəhərində yaşayıb.
Məqalədə Helenendorf almanlarının irsi ilə məşğul olan Berlin Humboldt Universitetinin Azərbaycan tarixi kafedrasının rəhbəri, professor Eva Mariya Aux tərəfindən ölkəmizdəki alman irsini əks etdirən xüsusi turizm bələdçisinin hazırlandığı, burada tarixi qəsəbə haqqında məlumat, şəkil və təsvirlərin əks olunduğu diqqətə çatdırılır. Qrupu müşayiət edən professor Auxun bələdçi barədə ətraflı məlumat verdiyi, orada göstərilən məlumatları qonaqlara əyani şəkildə nümayiş etdirdiyi bildirilir.
Qeyd olunur ki, Helenendorfa ziyarət vaxtilə burada yaşamış məşhur alman ailəsi, Yulius və Hermine Forerlərin evindən başlanıb. Hazırda regional muzeyin fəaliyyət göstərdiyi bu evə onların nəvələri – Tübingen şəhərindən Klaus Forer və Aalen şəhərindən onun qardaşı Tomas böyük həvəslə baş çəkiblər. Qrup üzvləri onlarda olan rayonun köhnə planı ilə küçələri gəziblər. Həmin planda küçələrin əvvəlki adları verilib. Qrupun üzvü Qizela Rasperin öz əcdadları Fottelerlərin evini tapıb. Evin indiki sakinləri onu “Əslində bu, Sizin evinizdir” sözləri ilə mehribancasına qarşılayıb.
Yazıda bildirilib ki, alman Kristof Forerin nəvəsi, hazırda Rusiyanın Sankt-Peterburq şəhərində yaşayan Marianna Rıbkin və oğlu Mixail də öz əcdadlarının evini ziyarət ediblər. Mariannanın anası və Kristof Forerin qızı, 1906-cı ildə Helenendorfda dünyaya gələn Elizabet Malzev 1979-cu ildən etibarən mütəmadi olaraq əcdadlarının vətəni Roytlingenə səfər edib, bir müddətdən sonra oraya köçüb. 2006-cı ildə orada vəfat edib. İndi isə Marianna və onun oğlu Mixail Kristof Forerin evini axtarıb tapıblar. M.Rıbkin əcdadlarının evinin şüşəbəndinə qalxaraq orada xatirə şəkli çəkdirib.
Məqalədə Göygöl Rayonu İcra Hakimiyyətinin başçısı Arif Seyidovun şəhərə gələn alman qonaqları salamladığı, professor Auxun Azərbaycan hökumətinin alman irsinin qorunub saxlanılmasına verdiyi töhfədən söz açdığı və bunun çox təqdirəlayiq olduğunu qeyd etdiyi diqqətə çatdırılır. Bildirilir ki, Roytlingenin mədəniyyət bölməsinin rəhbəri Verner Ströbelen 22 roytlingenli ailənin hazırkı Göygölün salınmasında iştirak etdiyini, bu iki şəhər arasında xüsusi bağlar olduğunu, o cümlədən Helenendorf və onun sakinlərinin tarixi irsini qoruyub saxlamağa çalışdığını söyləyib.
Yazıda qrupun Göygöldəki alman qəbiristanlığını ziyarət etdiyi vurğulanır, məzarların üzərindəki yazılar təsvir edilir. Onlardan bəzilərinin rus dilində tərcüməsinin də olduğu bildirilir.
Müəllif Azərbaycanda sonuncu alman hesab edilən Viktor Klayndan söz açır, 1936-2007-ci illərdə yaşamış Klaynın öz evini Almaniyanın Azərbaycandakı səfirliyinə hədiyyə etdiyini, onun evində muzey yaradılmasının nəzərdə tutulduğunu diqqətə çatdırır.
Vurğulanır ki, qonaqlar şəhərdə yerləşən müqəddəs Yohannes kilsəsində keçirilən bayram ayinində iştirak ediblər. Dini ayin 200 il öncə Azərbaycana köç etmiş Vürtemberq almanlarına həsr olunub. 1936-cı ildən bəri kilsədə heç bir ayin keçirilmir, binadan sovet dövründə idman zalı kimi istifadə edilib. Hazırda burada tədbirlər və dini ayinlər alman və rus dillərində təşkil olunur.
Məqalənin sonunda almanların 200 il öncə regiona köçünün tarixinə dair məlumat verilir. Rusiya çarı Aleksandrın köçürmə siyasəti çərçivəsində Vürtemberqdəki alman kəndlilərinin Rusiyanın yeni zəbt etdiyi ərazilərinə dəvət edildiyi, onlara xüsusi imtiyazlar verildiyi, 3 koloniyanın 1818-ci ilin əvvəlində Azərbaycana gəlib çıxdığı və qışı Gəncədə keçirdiyi bildirilir. Onların saldığı qəsəbənin çar Aleksandrın bacısı Yelena Pavlovnanın şərəfinə Helenendorf adlandırıldığı vurğulanır. Koloniyanın XX əsrin əvvəlində çiçəklənmə dövrünü yaşadığı, I və II Dünya müharibələri nəticəsində buradakı bütün almanların təqib, həbs və güllələnmə ilə üzləşdikləri və deportasiya nəticəsində 1941-ci ilin oktyabr ayında Helenendorfdakı alman ailələrinin mövcudluğuna son qoyulduğu nəzərə çatdırılır.
İrəvan-Kiyev münasibətləri korlana bilər – AKTUAL ŞƏRH
Ermənistanın Rusiya tərəfindən ilhaq edilən Krımla qarşılıqlı avia-reyslər təşkil etməsinə beynəlxalq ictimaiyyət sərt təpki verəcək
“Çünki dünya dövlətləri Ukraynanın ərazi bütövlüyünü tanıyır”
Ermənistan dünya dövlətləri arasında ilk dəfə Rusiya tərəfindən ilhaq edilən Krımla qarşılıqlı avia-reyslər təşkil edəcək. İrəvan-Simferopol uçuşları bu ilin mart ayından başlayacaq. Uçuşları həyata keçirəcək “İkar” şirkəti artıq bununla bağlı icazə alıb. Hazırda tərəflər arasında uçuş cədvəlinin uyğunlaşdırılması, həmçinin aeroportların razılaşdırılması prosesi həyata keçirilir. Krım parlamentinin Turizm, İdman və Kurort Komitəsinin sədri Aleksey Çernyak bu aviamarşrutun Krımın anneksiyasından sonra gerçəkləşdirilən ilk beynəlxalq reys olduğunu söyləyib. Təcavüzkar Ermənistanın separatçı rejimlərlə əlaqə qurmaqda həvəsli olması məlumdur.
Ümumiyyətlə, İrəvanın beynəlxalq prinsiplərə əməl etməməsi dəfələrlə sübut olunub. Ancaq hesab edilir ki, düşmənin təxribatçı hərəkəti rəsmi Kiyevlə münasibətləri xeyli gərginləşdirəcək. Hətta Paşinyan hökumətinin bu addımından sonra Kiyev Dağlıq Qarabağ münaqişəsinin həlli prosesində daha aktiv mövqe sərgiləyə bilər.
İrəvanın təxribatçı addımını “Şərq”ə şərh edən politoloq Ceyhun Əhmədli deyib ki, belə bir cəhd Ermənistanın Ukrayna ilə münasibətlərini korlaya bilər. Analitik xatırladıb ki, Ukraynanın ərazi bütövlüyü dünya dövlətləri tərəfindən də tanınır:
“Ermənistan dövləti bu mənfur addımı ilə həm də beynəlxalq ictimaiyyətin sərt təpkisini ala bilər. Ukrayna və Azərbaycan çox vacib strateji partnyorlardır. Bu yaxınlarda Prezident Vladimir Zelenskinin Bakıya etdiyi səfərin detalları da bu dediyimizi təsdiq edir. Tərəflər arasında olduqca geniş sahələri əhatə edən əməkdaşlıq perspektivləri müzakirə olundu. Hər şeydən əvvəl, Zelenskinin postsovet məkanında ilk olaraq Azərbaycana səfər etməsi Ukraynanın ölkəmizə olan etimadının göstəricisi idi. Bakıda Ukrayna və Azərbaycan rəhbərliyinin işğala qarşı bəyanatları, xüsusən Zelenskinin Azərbaycanın ərazi bütövlüyünə tam dəstək ifadə etməsi, düşünürəm ki, Ermənistana ötürülmüş vacib mesaj idi”.
C.Əhmədlinin sözlərinə görə, hər iki dövlətin separatizm təhdidindən əziyyət çəkməsi ümumi dəyər və maraqlar paradiqmasının zəruriliyini ortaya çıxarır:
“Bu da Ukrayna və Azərbaycanı beynəlxalq müstəvidə siyasi həmrəyliyə sövq edir. Münaqişənin bundan sonrakı tənzimləmə prosesində Ukrayna-Azərbaycan strateji tərəfdaşlığının müsbət töhfələrini görə bilərik. Ən azından Ermənistan tərəfi beynəlxalq platformalarda Qarabağla bağlı bizim maraqlarımıza zidd qətnamə və ya sənədin qəbul edilməsinə cəhd göstərsə, Ukrayna rəsmilərinin mənfi reaksiyası ilə qarşılaşacaq. Bu isə o anlama gəlir ki, məhz Dağlıq Qarabağ münaqişəsinə görə regional blokada şəraitində yaşayan Ermənistan beynəlxalq müstəvidə də Azərbaycanın hücum diplomatiyasına məruz qalmaqla mövqelərini əhəmiyyətli dərəcədə itirmiş olacaq”.
“Vikipediya”nın yunan dili bölməsində Azərbaycanla bağlı məqalələr yaradılacaq
